VENGTHLANG PASTOR BIAL TE CHE CHHUAK :
Champhai Vengthlang Pastor Bial KTP te chuan nimin khan Bial KTP Conference thurel bawhzuiin OST Centre, Champhaiah hun an hmang.
Bial hruaitute hi OST Medical Officer Dr Lalhlupuii Khawlhring chuan a lo dawngsawng a. He hun hi Bial KTP Leader HS Lalhmangaihzuala’n kaihruaiin, Upa B.Lalawmpuia, Asst. Leader hnen atangin Pathian thu ngaihthlak ani a, OST la laite atang pawhin thusawi ngaihthlak a ni bawk. OST thawktute hnen atanga thu dawn danin Champhai OST Centre atang hian OST ei tawh 527 an awm a, tuna ei lai hi Mipa 124 leh Hmeichhia 7, an vaiin 131 an ni. Heng OST la te atang hian kohhrana mi tangkai tak te, nitin eizawnna kawng tha taka zawhmek leh khawtlang tana tangkai tak tak an awm tih tarlan a ni bawk. Champhai Vengthlang Pastor Bial KTP te hian Champhaia Ruihhlo ngaite pualin Fehchhuah programme an hmang mek a. Zing leh tlai lamah ruihhlo-in a tihbuai mekte kal chilhin Pathian thu tawi hrilhin, tawngtaisakna hun an hmang thin a, ei tur an pe bawk thin ani.
Tunah hian Champhai Vengthlang Bial KTP huam chhungah hian Branch pali – Vengthlang, Venglai, Electric Veng leh Vengthlang North an awm mek a. Member Mipa 1277, Hmeichhia 836, an vaiin member 2113 an awm mek a ni
FARKAWN FACHUAM :
Ningani khan Farkawn VC leh NGO huaihawtin an khaw tlangval MCS tling thar K.Lalhlimpuia s/o K.Lalbuana lawmpuina leh chawimawina hun-YMA Hall-ah an hmang.
He hun hi K.Lalrema, VC Vice President-in a kaihruai a khawtlang aiawhin H.Khawliana, Farkawn HSS Principal -in lawmpuina thu a sawi a. MCS tling thar K.Lalhlimpuia’n thu a sawi bawk a. Farkawn hian direct-a MPSC hnuaia MCS inziak tling thei an neih vawikhatna a ni. K.Lalhlimpuia hian Pawl 1-12 thleng Farkawnah school-ah a kal a. Pawl 10 leh 12 hi III Division-ah a pass a. BA(Hist) Aizawl College-ah a zir a. MA(Hist) MZU hnuaiah a zir chhunzawm a. MA a zawh hnuah Farkawn HSS-ah 2012 khan zirtirtu hna a thawk a. Zirtirtu hna thawk chungin MPSC hnuaia exam hrang hrangte a bei thin a.
Kum 2014 ah UDC ah inziak tlingin a hna hi a ban san a. Champhai DIET-a a thawh hnuah Falkawn Referral Hospital-ah sawn a ni a. Kum 2018 khan MCS-ah hian a inziak tling ta a ni.
MINISTER IN PES TLAWH :
School Education Minister Lalchhandama Ralte chuan nimin khan Presbyterian English School Khawzawl Vengthar a tlawh a, zirlaite leh zirtirtute hmaah thusawiin, zirna chu Mission lamah let leh se, ram leh hnam kal zel tur atan mission rilru pu chunga kalpui a ngai a ni, a ti.
Sorkarin mission nen zirnaah thawhho a duh a, chuvang chuan tun hnaiah pawh Aizawl-a Sikul Sen an tih thin chu sorkarin Synod kuta hlan let leh turin thutlukna a siam a ni, a ti. Sorkarin a enkawl theih loh lam a ni lo va, Pathian hre chunga naupangten thiamna an neih hi a duh zawk a ni, a ti. PES Khawzawl Vengthar-in naupang 600 chuang an nei thei a, HSLC-ah result tha tak an nei thin chu lawmawm a tih thu a sawi bawk.
Nimin vek khan Hermon High School pawh a tlawh a, khawtlang din, private an nih avangin theihtawpa tan la sauh sauh tur leh naupang pawh tun aia tam hip khawm thei tura tan la turin a fuih a ni. Minister hian Chawngtlai a panna kawngah Chawngtlang a tlawh a, khawtlang hruaitute leh zirtirtu amah lo dawng sawngtute hmaah thu a sawi a. Lalchhandama Ralte chuan sorkar tharin khawtlang thatna atan zu khapna dan a siam a, thisen man tihbo a ni a, school timing thlak a ni a, inkalpawhna kawng Zoram hmun hrang hrangah siam mek a ni a.
SEDP pawh hman theih thuai beisei a ni, a ti. Minister hian Chalrang Middle School pawh a tlawh a, zirtirtu leh khawtlang hruaitute hmaah thu sawiin Minister chuan, sorkarin class tin daih zirtirtu pe turin ruahmanna a kalpui mek a ni, a ti a. Tun hnaia MR teacher lak turah chuan June thlaa training chhuak turte tan pawh a dil theilh dawn a ni, a ti. Education Minister Lalchhandama Ralte hi MLA pahnih Lalrinsanga Ralte leh C.Lalmuanpuia bakah Add Director School Education K.Laldingliana ten an tawiawm a ni.
PANGNGANG IN A TIHBUAI EN HO :
Nimin chawhnu khan Ruantlang khuaa KC Lalhmangaihzuala Vaimim, tunlaia Mizoram hmun hrang hranga pangang chi khat Fall Armywarm-in a eichhiat mek chu Champhai-a MJA Member ten a hmunah kal chilhin pangang sulhnute a hmunah an enfiah a.
Champhai DAO George Lalthanngura leh Agriculture Department mi thiamten MJA member-te hi an kaihruai a ni. Ruantlang khuaa KC.Lalhmangaihzula hian a chuktuah huanah Vaimim Kg. 10 vel chingin a Vaimim to hmasa ho chu enkawl zui tlak lohvin pangang hian an ei chhiat sak a. He khuaa mi thenkhat pawhin an Vaimim te a him loh thu an sawi DAO George Lalthanngura chuan Vaimim te hi a vui tan tawh a, enkawl zui dan vak a awm tawh si lo va; thenkhat hi chu enkawl zui that chuan a la thar thei ang tih sawiin, Vaimim to hlim enkawl zui dan turte an zirtir nghal a ni. Tun dinhmunah Champhai district ah khaw 17-a Vaimim te Fall Armyworm hian a tichhe tawh tih report a ni a, chhungkaw 590 in harsatna an tawk mek bawk.
PU CHHURA HOTE AN CHE CHHUAK :
Nimin khan Bethel Chhura Hmun Welfare te chuan, Electric Bill pe thinte thutna tur thut thleng chu Champhai Power Sub-Division, P&E Dept hnenah an hlan. Chhura Hmun Welfare-te hian Chhurbura meichher 4 siam turin hma an la mek a, July thlaa peilh hman an inbeisei a. Kumin chhungin a mamawh apiang hman tura District Blood Bank-a thisen dah turin Blood Donation Camp vawi 2 neih an tum bakah an veng chhung cheina turin hma an la mek bawk.
LEGAL METROLOGY TEN ENDIK :
Champhai mipui tana Mizofed-a Gas leh diesel thleng chu nimin khan Legal Metrology ten an endik a, gas hi buk a tlingin a seal a tha a, diesel pawh hi dan phal chinah awmin tank-ah dah luh tir an ni a, gas lo thleng pawh hi sem chhuah nghal a ni.
TUIALHTHEI DINHMUN :
Mizofed Pump (Jail Veng)
Petrol (ms) Free Sale
Diesel (hsd) Free Sale
RC Filling Station (Zote)
Petrol (ms) Service Tanky
Diesel (hsd) Service Tanky
RD Filling Station (Ramhrangkawn)
Petrol (ms) Service Tanky
Diesel (hsd) Free Sale
Comments are closed.