LIRTHEI DAN CHUNGCHANGAH INBIAKNA NEI TURIN ZOKHAWTHAR VC LEH NGO TE A IN KAU RENG :
Champhai Zokhawthar VC leh All NGO Coordination Committee chuan thuchhuah siamin Champhai Transport Union te chuan Zokhawthar atanga Bungraw phur lirthei ang dan chungchangah dikhlel taka thuchhuah a awm niin an thuchhuahah an tarlang.
An thuchhuah a an tarlan danin CTu hian Zokhawthar khawtlang nen inremna an lo nei tawh a. Kum 1997 khan kha tih lai SDO (Civil) hriatpuina in AO ho in inremna an lo siam tawh a. Zokhawthar khawtlangin Special Load Trip khat an lak bakah khawtlang hriatute zinin Petrol man an phut remtih a nih thu an sawi a. Khawtlangin Special Load an lak chu duh loin thla khatah Rs. 10000 in anmahni thuin an bithliah a. Hun engemaw ti hnuah Rs. 8000 ah tihniam leh in pek tawhlo thlengin anmahni thu zelin thil an lakpui tak ah chuan Zokhawthar khawtlangin kawng dang a dap lo thei ta lo a, Zokhawthar Welfare Committee (ZWC) chu November ni 9, 2017 din alo nih thu an sawi. Zokhawthar Welfare Committee nen hun engemaw chen DC Chamberah Meeting neih niin inremna hmasa ber ziah a nih thu an tarlang a. Zokhawthar khawtlangin Contribution alak tur ziahah hian tun thlengin sawiselna leh duh loh thawm an hriat loh thu an sawi.
ZWC chuan Contribution rate chungchang sawi tur hian englai pawhin an in kau reng tih sawi bawkin Zokhawthar VC leh All NGO Coordination Committee-in kum 2018 Sept thla atanga Senior pekchhuah a chelh chinah Vai truck Load mek an nih an hriat loh thu an sawi a. Senior a lutlo Sawhthiang erawh an phur ve zeuh zeuh thin niin an sawi. Lirthei 207, 407 leh a dang te a Load chang thin ten vawi tam tak Rate siam sak tura an ngen chungin bungraw neitu leh Lirthei neitute inbiakna turah ngaiin kan siam ngai lo va. Load phur tur ten an sawi zin em avangin Rate hi siam sak an ni a. Lirthei neitute thu loin eng Rate mah kan ti sang ngai lo a ni an ti a. Heng pawh hi an lungawi loh phah a nih chuan kan hnukdawk reng thei niin an sawi bawk.
Sumdawnna behchhan pawl atam em avangin Zokhawthar khawchhungah eng pawl mahin rorelna thuneihna hman hi an remti ngai dawn lo a. Hlawhna um leh duh theih kan nih avang chuan Rate thu ah te, thildang kalphung fello lai te sawi a inbe rem tur erawh chuan kan in kau reng a ni an ti.
MNF MP CANDIDATE IN PRESS MITE KAWM :
MNF MP Canidadate C. Lalrosanga chuan nimin khan Champhai District MJA Press Club-ah Press Conference neiin MP a thlantlin ni ta se ram tana a hmalakna tur chi hrang hrang thuthar thehdarhtute hmaah a tarlang.
Pu C. Lalrosanga chuan Sawrkar tana rawng a lo bawl tawhna hmanga dai hriat a neihte hmangin ram rorelna kawngah tangkai ve na tam tak a neih tur thu sawiin, amah mimal pawhin a vei thin Hmarchhak mite tan leh Zoram pawna Zohnahthlakte tan zau zawk leh nasa zawk a tangkai theihna a nei dawn a. MP atana thlantlin a nih chuan Mizoram leh a chhunga chengte humhim tura theihtawp chhuah a tum thu leh ramri depa Zohnahthlakte nen inpumkhatna tha nei tura theihtawp chhuah a tum tih tarlangin . Tun aia dinhmun tha zawk leh thawhhona thaa awm theihna tura theihtawp chhuah a tum thu a sawi.
Bangladesh leh Myanmar ram nena insumdawn tawnna chungchangah tun dinhmun aia tha zawk a kalpui a nih theih nan State Sawrkar hmalakna piah lam Sawrkar laipuiah MP niin theihtawp a chhuah tur thu a sawi a. Ram leilung hausakna haichhuah leh dapchhuah kawngah MP in mawhphurhna a neih a piang hlenchhuak tura tanlak a in huam thu a sawi a. Pu C. Lalrosanga chuan ramri kana inkalpawhnaah dan loa ramri te ruihhlo leh ralthuam bakah dan loa bungrua lakluh a awm lohna tura Sawrkar laipuiah tanlak a tum thu a sawi.
CAB chungchangah kan hnam leh sakhua himna turin theihtawp chhuah a lum a. Lok Sabha ah he CAB chungchang hi put luh emaw sawi chhuah a nih chuan a do zawnga ban a phar tur thu leh hetiang kawnga hmalak awmna apiangah theihtawp chhuaha CAB do zawnga tanlak a tum thu a sawi a. Khawchhak tlangdung inkalpawhna kawngpui leh inbiak pawhna ti tha tura theihtawp chuah a tum thu tarlangin Champhai khawpui bulah thlawhna tumhmun siam a nih theihna tura theihtawp chhuah a tum thu a sawi tel bawk.
Pu C. Lalrosanga hi Champhai South Bialtu MLA leh Minister Pu TJ Lalnuntluanga leh MNF Party Hqrs. hruaituten an tawiawm a ni.
K. THANGDAILOVA MEMORIAL FOOTBALL TOURNAMENT :
Nimin khan K. Thangdailova Memorial Football TOurnament Under 14-ah Semi Final khelh zawh a ni.
Semifinal hmasa zawkah Kahrawt FC leh Zotlang FC te an inkhel a. Kahrawt FC te hian 5-1 in Zotlang FC hnehin Final an in pet kai a. Semi Final hnuhnung zawkah Venglai FC leh LKS Hnahlan FC te inkhel ve lehin
Vawiin hian Under 17 ah Semifinal khelh ve leh a ni ang a. Inkhel turte chu
Venglai FC (11:00) New Champhai FC
AFC Academy, Khawzawl (1:00) Zo Club, Champhai
MNF NU HOIN MARTARTE CHAWIMAWI :
Nimin khan Mizo National Women Front, Hqrs. chuan Champhai Sub-Hqrs. YMA Hall ah ram tana penchhuak hmeichhiate chawimawina neiin Champhai North Bialtu MLA Dr ZR Thiamsanga'n a hmanpui.
He hun hi Helen Zamluti, President, Mizo National Women Front, Champhai chuan a kaihruaia. Khuallian Champhai North Bialtu MLA Dr ZR Thiamsanga chuan hrehawmna leh harsatna hmachhawn tura ram tana inpe te hi Mizo hnam tan chuan an hlu a, chawimawi tlak an ni a ti a. Mizoram a hun thim lai ber rambuai laia Mizoram tana an tha thawhte leh chhel taka harsatna hrang hrang an paltlang avangin Mizoram chuan tun dinhmun hi a thleng thei a, ram tana penchhuakte hi ro hlu an ni tiin ram tan thahnem an ngaihna te leh an in pekna te chu thangtharte hian entawn se, ram hmasawnna tur leh ram tha zawk siam zel duhna rilru put tir tu nise a duh thu a sawi.
Dr ZR Thiamsanga te chuan rammu te chu tun Sawrkarah hamthatna an dawn theihna turin ngaihsak an ni dawn tih a sawi a. Sawrkarin chhawmdawlna tur hi a theih ang kawng hrang hrangin a ngaihtuah dawn a ni a ti.
Pi K. Lalrengpuii, President, Mizo National Women Front, Hqrs. pawhin thu sawiin Mizo ten zalenna famkim nei tura hmeichhe penchhuakte chu zahna chibai a buk a. Heng Mizo Hnam hmangaihtu te tan hian Mizo National Women Front chu a awm reng tur thu leh Mizo awm chhung chuan a hriatreng tawh tur thu a sawi a. An hrehawm tawrhna avanga Mizoram tun dinhmun hi thleng thei a nih thu a tarlang tel bawk. Mizo National Women Front hian ram tana penchhuak hmeichhiate chawimawina hi nikum atanga ruahmanna losiam tawhin Mizoram khaw hrang hrangah an nei chho mek a, nimin khan Champhai District a mi 21 te hnenah
chawimawina thuziak leh pangpar an hlan a. Khawpui dangah mi 247 te hnenah chawimawina hi an lo hlan tawh a, nimina chawimawina hlannaah hian Martarte sunna hun hman tel a ni bawk.
TUALCHENGAH DAMLO A THLAWNIN EN :
Nimin khan Champhai District MMU te chuan Tualchengah Awareness Campaign cum Free Clinic an nei.
He Free Clinic hi Tualcheng Community Hall ah damlo 98 enin damlo an en te hnenah hian damdawi a thlawnin an sem bawk. MMU atangin Dr Joela hoin Staff 8 an an kal thei a, hei bakah hian NPPCD te pawhin a thlawnin ri hriatna that leh thatloh an endik sak bawk a ni. He hunah hian inkhawm tawi neiin rilru hriselna lam ngaih pawimawh a ngaih thu leh ri hriatna ngaih pawimawh a ngaih thu te. Champhai District Hospital ah ri hriatna that leh that loh entir theih reng a nih thu te tarlan a ni bawk.
YMA CHHANG TEN HUN HMANG :
Nimin khan Champhai Venglai Branch YMA Chhang te chuan a vawi khatna atan YMA Chhang Day an hmang.
He hun hi Champhai Venglai COmprehensive Middle School tualah hman niin Pu Lalrinmawia, Convener chuan tunlai chhanah naupang Upa zawkte tirhkal theih loh tam tak an awm thu sawiin, helama naupang taima leh aia upa te thuawi theih tak dinchhuah hi YMA Chhang dinchhan a nih thu a sawi a. Tlawmngaihna Mizo thalaiah bo mek nia lang hi YMA Chhang atanga zir that leh an ngaihthu a sawi. Tlawmngaihna chuan taimakan a siam thin a, puih ngaih kan hmuh reng rengin kan puih theihna a nih phawt chuan theihtawp chhuahin kan pui thin tur a ni a ti a. Naupangte chu hawihhawmna ngai pawimawh turin a chah bawk.
Nimina YMA Chhang Day ah hian YMA Chhang Member 250 vel an kal khawm a, Group pathumah then darhin Mizo infiamna chi hrang hrang hmanin an intihsiak bakah Mizo hnam lam chi hrang hrang hmangte in intihsiakna hlimawm tak an nei a ni. Champhai Venglai Branch YMA Chhang te hi Branch YMA hmalaknain kum rei tawh tak liam ta atang khan din a lo ni tawh a. Kumin hi YMA Chhang Day an hman vawikhatna a ni.
YMA Chhangte hian kartin Inrinni apiangin Vengchhung thenfai hnatlang an nei thin a, School chawlh lai a nih chuan chhunah Vengchhung tihfai hnatlang an nei bawk thin a ni. Hei bakah hian tlai tin Venglai Comprehensive Middle School kawtah Mizo hnam lam chi hrang hrang zirtir thin an ni bawk.
MAZUIA HRIATRENGNA VOLLEYBALL TOURNAMENT ZO FEL :
Nimin khan Champhai District Volleyball Association buatsaih Mazuia Memorial Volleyball Tournament chu zawhfel a ni.
Kharna inkhawm hi Er. J. Lalhmachhuana, EE Champhai Power Division chuan khuallian niin a hmanpui a. Thusawiin thalaite thiamna phochhuak tura hmala tur Pu Lalzuithanga chhungte leh CDVA te chu fakawm a tih thu a sawi a. Champhai lo ti hmingthatu Mazuia hnungzui turin Volleyball Players te tanla turin a fuih bawk. Ruihhlo avangin thalai tam takin harsatna an tawk a, ruihhlo avanga thalai tam tak Tan In leh Center a awm lai leh mi tam tak an thih laia infiammi ruihhlo a fihlim thalai tam takte, Pastor leh Missionary a lak sen loh thalai tam tak Pathian in min la pe hi lawmthu sawi nachang kan hriat a ngai a ni a ti a. Infiam mite chu an kalzelna turah duhsakna hlanin Pathian an chawimawi chuan A nin a chawisang zel dawn a ni tih leh an tih apian Pathian ropuina tur hlira ti thian turin a chah bawk.
Kharna inkhawm Kahrawt Field a neih hi Pu C. Lallianpuia, Vice President, CDVA chuan kaihruaiin Pu Lalfakzuala, Secretary, Technical Board CDVA hnen atangin report ngaihthlak a ni a. Pu Lalzuithanga (Mazuia) Chanchin ngaihthlak a ni a, Trophy petu Mazuia chhungte atangin Pu Rohnaa Sailo hnen atangain thusawi ngaihthlak a ni bawk.
Hmeichhe final ah hian LCN Volleyball Club leh Chawngtlai Volleyball Club te inkhelin. LCN Volleyball Club te hian
3-0 a hnenin an Champion a. Mipaah MZ Home, TNT leh Chawngtlai Finalin MZ Home, TNT in 3-2 a hnenin an Champion bawk.
Comments are closed.