ni 24.9.2016 (inrinni)
CHAMPHAI DISTRICT PAWNA DAIKAL AWMLOHNA (ODF) A PUANG TURA HMALAKNAIN A VAWRTAWP THLENG MEK :
Champhai District chu pawna daikal awmlohna District, Open Defecation Free (ODF) District a nih theih nana hmalakna chuan a vawrtawp thleng mekin District chhunga thingtlang khua zawng zawngte pawh state level-a endiktute endik tura an inpeih thu State Water & Sanitation Mission hnenah District Bawrhsap chuan ziakin a thlen a. Nimin vek khan Champhai District Urban Development Officer office Chamber-ah Champhai District chunga khawpui pali, Champhai, Khawzawl, Khawhai leh Biate te chu Open Defecation Free (ODF)-a puanna hmahruai, ODF Preliminary Declaration neih a ni bawk.
Champhai District-ah hian RD Block pali hnuaiah thingtlang khua, rural area 80 a awm a. Khawtinte hian Village Water & Sanitation Committee leh Village Level ODF Verification Team insiamin an khua theuh an endik hnuah pawna daikal/inthiar awmlo an ni tih an chian hnuah ODF Village-a inpuanna BDO Office-ah an thehlut a. Block Level ODF Verification Team-ten an huam chhung theuha in zawng zawng zaa sawmhnih aia tlemlo chu thla thum danah tum hnih an endik leh hnuah ODF a ni ngei tih pawmpuiin District Water & Sanitation Committee hnenah ODF Block an nih thu an thlen leh a. Tunah hian District Level ODF Verification Team-te chuan District puma in 5% an verify leh hnuah ODF District atan tling tawkah ngaiin State Water & Sanitation Mission Chairman hnenah endik turin ngenna a thlen ta a ni.
Khawpui chhung VC 28 te leh an huam chhunga Self Help Groups te, Zirna in leh zirlai zawng zawngte chuan in lam leh hmundangah pawh ekin hman tur an neih thu an inpuanna behchhanin District Urban Development Officer, Pi V. Lalmuanpuii, MCS chuan vawiin chawhnu dar 2 khan Champhai District chhunga khawpui, urban area palite chu ODF an nih thu puanna hmahruai, ODF Preliminary Declaration a Office Chamber-ah a nei a. Preliminary Declaration neih atanga ni 15 chhungin complaint duh nei tan complaint-na hun hawn niin hemi chhunga complaint a lutlo a nih chuan ODF a puan an ni ang a, chumi hnuah State sawrkar leh sawrkar laipui atangin endik leh a ni ang.
Champhai District-ah hian khua/veng 108 awmin chung zinga 80 chu thingtlang, rural area niin 28 chu khawpui huamchhunga awm a ni a. Thingtlang lamah hian DRDA leh PHE ten hma an la a, DRDA hian MGNREGS hnuaiah kum 2015-16 leh 2016-17 chhung khan ekin sak tanpuina mi 1010 hnenah an pek laiin PHE Department hian kum 2012 atang khan Swachh Bharat (GRAMIN) hmalakna hnuaiah ekin sak tanpuina mi 821 hnenah an pe tawh bawk. Khawpui huam chhung hi UD&PA chan niin January 2016 khan ekin chhungkaw 45 tana an sak tawh bakah August 2016 khan chhungkaw 361 tan a sak sak leh bawk.
Champhai District ODF a nih theih nan hian DC Office kaihhruaina hnuaiah DRDA, UD&PA leh PHE Department-te bakah veng/khaw hrang hrang VC leh YMA te an tangrual hle a. District huam chhunga Office hrang hrang leh mipuite bakah State sawrkar lam pawhin Champhaiin ODF ni thei tura a hmalakna hi an phur puiin an tawiawm tha hle a ni.
PI VANLALAWMPUII HOVIN ‘HEART TO HEART DISCUSSION’ HMANHO A NI :
Nimin chawhnu dar 1:00 khan Mizo Hmeichhe Tangrual Hall, Khatla-ah All Mizoram Women’s Federation buatsaih ‘Heart to heart Discussion on Political Empoerment for Women In Mizoram’ tih hman a ni a. Hrangturzo bialtu MLA Pi Vanlalawmpuii Chawngthu, Mizoram State Women Commission, Chairperson ni bawk chuan he Discussion hi a hmanpui a ni.
Dinhmun chawikanna leh anmahni tanpui tura lungrual taka an in suihkhawm thei chu thil lawmawm tak leh hmasawnna kawnga pawimawh tak a ni tih sawiin khuallian Pi Vanlalawmpuii chuan hmeichhia te hian dinhmun tha chan kan duh a, hmasawn kan duh a, chumi tur chuan mipa te nen kan in karah harsatna a awm thin. Ram leh khawtlang ah te, NGO ah te pawh chanvo pawimawh chelh turin mipa ten min pawm lo a nih pawhin keimahni hian kan pawm thiam a ngai a, min pawm lohna te pawh mipa te tana an pawm ngam, an rin ngam kan nih ve a tul a,chanvo leh nihna hi dil chhuah chi a ni loa, a thawha thawh chhuah tur a ni a ti.
Aizawl Municipal Corporation te, Local council leh Village Council-ah te hmeichhia te tan hmun siam a ni ta chu kan hnam hmasawnna duhawm tak a nih thu leh politics kal kawng chu thil namai a nih loh thu khuallian chuan sawiin, MLA ni tur hian kalkawng harsa leh thui tak zawh tur a awm a, mi harsa leh rethei te, tanpui ngaite hmangaihna thinlung pu in, chan ngam leh rethei ngam tur lo chuan he kawng hi zawh chi a ni lo, a ti bawk .AMC leh Local council-a hmeichhe member te pawh, politics-ah tawn hriat nei lo ni mah ila, he huntha tak hi nakin zel a kan hmeichhe pui te tana kawng hnawhpingtu ni lova, hmeichhia te tana kawng sah en sakna hun tha leh pawimawh tak nih a tul thu a sawi bawk.
Dr Jane Ralte kaihhruai he hunah hian Mizoram chhunga Political Party hrang hranga Hmeichhe aiawh te, Thlaithar zuartu pawl leh Hmeichhe hmasawnna tura thawktu pawl hrang hrang 11 an tel a, Prof. T. Vanlaltlani, ATC leh Pi Zothankimi, Mizoram Women Federation Adviser-te paper buatsaih zir-ho a ni a, AMC-a hmeichhe councilor te leh MZU, College-a hmeichhe zirtirtuten thu an sawi bawk.
All Mizoram Women Federation hi kum 2011, November 9th khan din a ni a, he pawlah hian hmeichhe hmasawnna tura thawktu pawl 11 awmin, hmeichhia te hmasawnna tur kawng hrang hrangah nasa taka thawkin MLA inthlan atan Chief Minister hnenah Joint Petition All Mizoram Women Federation leh MHIP tang dun chuan an lo theh lut tawh a ni.
VAWIIN DINHMUN :
MIZOFED POL (Tuialhthei) Ph :8414965293
(Mon – Sat :- 6:00 AM – 7:00 PM) (Sunday :- 12:00 Noon – 3:00 PM)
Petrol : Tanky Only (Rs. 60.17/litre)
Diesel : Tanky Only (Rs. 50.20/litre)
Comments are closed.