ni 22.9.2016 (ningani)
LEHKHABU TLANGZARH :
Nimin chhun dar 12 khan Champhai DC Office Conference Hall–ah Champhai District Park Committee Chairman, District Bawrhsap Pu Vanlalngaihsaka, IAS chuan Pu C. Lalthanmawia lehkhabu ziah ‘Mizo Pipute Thlarau Kalkawng Part II’ a tlangzarh. He lehkhabu hi February ni 19, 2016 a District Park Committee thurel bawhzuia Pu C. Lalthanmawia, Mualkawi, buatsaih niin nimin khan District Park Committee chuan a release a, copyright erawhchu a ziaktu kutah a awm zui dawn a ni.
District Bawrhsap Pu Vanlalngaihsaka, IAS chuan lehkhabu release paha thu sawiin District Park Committee in Mualkawi rama Hringlangtlang chu khualzinte hip nan leh thangtharten Mizo nunhlui an ngaihven thar theih nan District Park a siam tum a nih thu leh hmalak tawh dante a tarlang a.
Lehkhabu ziaktu Pu C. Lalthanmawia chuan a lehkhabu ziah sawi hawnna a nei a. ‘Mizo Pipute Thlarau Kalkawng Part II’ hi bung 9-ah then niin hmanlai Mizote nuna Hringlangtlang pawimawhna leh tun hun thlenga he tlang dinhmun chipchiar taka tarlan a ni a, Mizo nunhlui lama tuimite tan lehkhabu chhiar manhla tak tur a ni.
Hringlangtlang hi Mualkawi, Champhai District, atanga Km 7 a hla a awm a ni.
Lehkhabu tlangzarna ah hian Champhai-a Head Of Office te leh lehkhabu ziaktu Pu C.Lalthanmawia chhungkhat laina te an tel a ni.
CLEANLINESS WEEK HMAN DAN TUR REL :
Nimin chawhma dar 11 khan Champhai DC Office Conference Hall–ah Cleanliness Week 2016, October ni 1 – 7 chhunga hmandan tur ngaihtuahin meeting neih a ni a. Meeting hi Champhai District Bawrhsap Pu Vanlalngaihsaka, IAS in kaihruaiin Head of Office te bakah khawpui chhung VC te, Sub Headquarters YMA leh Champhai District MJA aiawhte leh local cable TV neitute an tel a ni.
Meeting kaihruaitu District Bawrhsap Pu Vanlalngaihsaka, IAS chuan Champhai District in tunhnaia faina kawnga hlawhtlinna a neihte tarlangin India rama district zawng zawng zinga faina lama pakuana dinhmun Champhai District in a hauh thei chu lawmawm a tih thu a sawi a. Faina kawnga hmalakna kalpui fimkhur a tul thu sawiin Chairman chuan veng dang leh mipui tan harsatna siam zawnga faina kalpuilo turin mipuite a ngen bawk.
Nimin meeting chuan Cleanliness Week 2016 hmandan tur program duangin a hawnna Programme pui ber chu October ni 1, 2016, chawhma dar 10 ah Kahrawt field-a neih turin a ruahman a. He hunah hian Department hrang hrang hotu, VC leh YMA aiawh, Scouts and Guides leh zirlai kalkhawmten faina hnatlang an nei zui ang a, hemi rual hian veng hrang hrangah VC leh YMA te kaihruainain mahni veng chhung theuhah faina hnatlang neih tura ruahman a ni bawk.
Meeting vek hian Cleanliness Week 2016 pualin, Aganwadi te, Primary School te, Middle School te, High School leh Higher Secondary School te, Govt. Champhai College leh DIET huamtel in sawrkar office hrang hrangte bakah veng hrang hrangte chu category hran theuha thenin fai lama inelna a buatsaih dawn a. Biate leh Khawhai tan bik veng chhung inelna buatsaih a ni bawk ang.
Cleanliness Week 2016 pual hian mimal, vantlang hmunhma vawnfai kawnga thawk thate chawimawina pek tum la nih bakah awareness programme chi khat atan faina chung changah inelna hrang hrang buatsaih tura ruahman.
Cleanliness Week 2016 programme kharna hi October ni 7 tlai dar 2 ah, Govt. Champhai Multipurpose Hall ah neih a ni ang a, inelna chi hrang hranga tithate lawmman sem nghal a ni bawk ang.
PAWLTHAR DIN :
Champhai Automobile Workshop Owners` Association chuan Tourist Lodge Conference hall ah din thar niin, an hruaitu turte an thlang nghal a. President : Sapsailala, New Champhai; Secretary : Vanlalfela Pachuau, New Champhai; Treasurer : HC Liantluanga, Kahrawt; Fin. Secretary : H. Hmingthantluanga, Electric te an thlang a. hruaitu hi kumtina thlan thar tura tih a ni a, he hunah hian workshop rate bakah pawl dan leh hrai te an duang nghal.
FORM FILL UP SAK :
MZP Hqrs. Champhai chuan zirlai a mamawh apiangte tan an Office Top Floor, CHANEM Building, I&PR Conference Hall bulah zirlaite tan Scholarship Form an Fill Up sak thei ta. Primary tan Rs. 50 a ni a, a chunglam tan Rs. 100 a ni ang. MZP in Form a siam a, tihsual a awmloh nan chu chu lakchhuaha Inah dik taka Fill Up hnuah chumi mil chuan an lo fill up leh dawn a ni.
AWARENESS :
Nimin khan Champhai District Tobacco Control Cell te chuan Govt. Vengthar Middle School a zirlai te hnenah zuk leh hmuam that loh zia in zirtirna hun an hmang a. he hunah hian zuk leh hmuam tih that lohzia bakah natna a thlen theih chi hrang hrang zirlaite hnenah hrilh hriat niin, lehkhathiam leh rilru chak tur chuan zuk leh hmuam a insum a ngaih thu tarlan a ni bawk. He hunah hian zuk leh hmuam ti lo turin zirlaite chuan intiamna neiin, zirna in ah Signage, tar tur ang te pek a ni bawk.
VAWIIN DINHMUN :
MIZOFED POL (Tuialhthei) Ph :8414965293
(Mon – Sat :- 6:00 AM – 7:00 PM) (Sunday :- 12:00 Noon – 3:00 PM)
Petrol : Beisei (Rs. 60.17/litre)
Diesel : Free Sale (Rs. 50.20/litre)
MIZOFED LPG (Gas)
(Vawiina an semna hmun)
NIL
ni 21.9.2016 (nilaini)
TOMATO DAH THATNA TUR HORTICULTURE DEPT IN PE :
Nimin khan Champhai District Horticulture Department chuan Tuipuia Tomato chingtu te hnenah Tomato pack-na tur hmanrua an pe.
Nimin khan Champhai District Horticulture Department chuan Tuipuia Tomato chingtute hnenah Tomato thar chhuah thawn chhuahna tura pack-na hmanrua an mamawh angte Horti Director-in tun mai chawp lehchilha an mamawh a awm thei ang ang te ngaihtuahsaka a pek chu Pu Lalhmangaiha DHO Khawzawlin nimin khan a hlan a ni.
Pu Lalhmangaiha DHO chuan thusawiin Open field a Tomato hlawhtling taka Tuipui khuaten an ching thei chu lawmawm a tihthu leh hemi atana sulsutu leh hmalatu Dept hrang hrang KVK Khawzawl, Horti Dept, DRDA Project director Champhai District leh Agri Dept te’n thawh hona tha tak an neih vang anih thu sawi langin chunzawm zel tlak anih thu a tarlang bawk.
Mizoram hmun hrang hrangah kut hnathawktute ten hlawhtlinna changin eizawnna ngelnghet an lo neih phah tawh a, Tuipui khuaa kuthnathawktu ten hmun danga thawnchhuah tham Tomato thar chhuak tura an thawhrimna chu fakawm a tih thusawiin Tomato thar tam ringawtah an rilru seng lova tomato thianghlim leh hriseltha thar chhuah kawnga tan la tura chahin. An tomato thawnchhuah avangin Mizoramin engtin nge a hriat reng dawn tih ngaihtuah chunga Tomato avanga hausak ringawt tum lova ei tlak leh hrisel thar chhuah kawngah tan la zual turin a chah bawk.
Tomato te hlawk zawka thar chhuak tur chuan a enkawl leh a hralh chhuah kawnga fimkhur a ngaih thusawiin leitha leh damdawite pawh mithiam zawkte’n a hman dan tur bituk an siam baka uchuaka hmang lo turin a chah bawk.
Tomato Pack-na hmanrua semchhuahna inkhawmtawi hi SDHO’s Office, Champhaiah neih niin Pu Lalvuansanga SDHO CHamphai chuan kaihruai a, Tuipui Tomato Growers Association hnen atangin an Tomato thar chhuah thawnchhuah kawngah a dahna tur hmanrua an neih loh avangin hralh tlak loh tam tak awm thin sutkianna tura Horticulture Dept hmalaknaa a pack-na hmanrua an dawng thei chu lawmawm an tih ngaihthlak niin Tomato an tharchhuahna tura Sawrkar Dept hrang hrang atanga tanpuina an dawnah lawmthu an sawi bawk.
Tuipuia an tomato chin variety te hi Arka raksak Leh Arkasamrat niin heng variety te hi KVK Khawzawla senior scientist Malsawmkimi NHRDF Hookly leh IIHR Bangalore atanga a chah chhuah sak an ni a. He variety hi open fieldah Tuipui chauh niloin hmun hrang hrangah hlawhtling tak a chin niin hemi kawngah hian nasa zawkin Horticulture Dept chuan hmalak an tumthu tarlan a ni bawk.
Tuipui khuaah hian Tomato chin eizawnna atana hmang hi chhungkaw 15 awmin hengmite hnenah hian hmanrua sem a ni a. He hun hi Pu K Thangkhuma H/D Champhai Circle in lawmthusawiin a khar a ni.
DISTRICT PARK CHEI DAN TUR RELHO :
Nimin chawhnu khan Champhai District Park Committee chu an chairman Pu Vanlalngaihsaka, Champhai DC hovin DC Conference Hall-ah an thukhawm.
He hunah hian meeting hmasaa thu dah, Champhai District Park chungchang Pu Thanmawia, Mualkawi khuain lehkhabu a ziah chungchang ngaihtuah a ni a. Lehkhabu hi tihchhuah theih tura peihfel ni tawhin, committee chuan a publish dan tur hrang hrang an rel a. He lehkhabu tlangzarh bakah a zau thei ang bera zawrh chhuah dan turte an sawiho nghal a ni.
Hei bakah hian Champhai District Park, Mualkawi rama Hringlangtlang tihchangtlun dan tur te, kut thlak hmasakna turte bakah a enkawl zui dan tur te huam zau taka sawiho a ni bawk. Champhai DC Pu Vanlalngaihsaka chuan Hringlangtlang chu Mizo history-a thil pawimawh a nih angin District park-a cheibawl a nih hian Pipu sulhnu kan humhalh theih dawn bakah, khualzinte tan Champhai chu khualzinte tlawh manhla a nih lehzual a beisei thu a sawi a ni.
CHAMPHAI-AH MARTAR-TE NI HMANG :
Mizoram hmun dang rualin nimin khan Champhaiah martarte ni pualin hun hman a ni.
Champhai North leh South Block MNF te tangkawpa buatsaih Martarte Ni inkhawm, Kahrawt YMA Hall a neih hi Lalhmingliana, Ex MP, Rajya Sabha chuan a hmanpui a. Thusawiin, Martarte avangin Mizoram chuan tun dinhmun hi kan thleng thei a ni, a ti a. martar Ni hi ramhnuai Sawrkar khan hman turin a lo rel tawh a, mahse Mizoramin remna a neih hma chuan hman tak tak theih a ni lo va. Ramna leh muanna kan neih hnuaherawh Mizote tana ni pawimawh a ni ta zel ani, a ti. Mi thenkhatin ram lehhnam tana nunna hlantute kha sawi nep tumin zalenna an suallo ang hialin an chhuah thin a; mahse maratarte hian an thil neih hlu ber, an nunna chu an ram leh hnam tan te, an thiante chhan nan an hlan a. Mizoram tana an inpekna kha thil tak tak niin, an hrehawm tuarna avang te, an thisen far avangin keini hi thlamuang takin kan awm thei a ni, a ti.
Sawrkar hian mipuite hrehawmna hmu duh miah lovin mahni nawmsakna atan ro a rel a, tuna kan Mizoram kaldan hi chu martarte nun hlan chhan nen a inpersan tawh hle ani, tih a sawi a. Mzioram dinchhuahna tur chuan kalsan tur tam tak a la awm a, hmasawnna tur a la inchhawp hnem hle a ni, a ti bawk.
Nimin inkhawm hi R. Thangseia, President, MNF Champhai South Block chuan a kaihhruai a. MNF General Hqrs. leh Martar chhungte hnen atanga thusawi ngaihthlak a nih bakah, Martarte zahna lantir nan ngawi rengin an ding bawk a ni. Hemi hma hian martarte ni pualin CHANEM tuala martarte thlanah pangpar dahin zahna an lo hlan tawh bawk a ni.
REGISTRAR LOKAL :
Sangdingliana, Registrar, Cooperative Societies Mizoram chuan nimin khan Champhai-a ARCS Office a tlawh.
Chawhnu lamah Champhai Town Multipurpose Cooperative Society Ltd. in School an enkawl mek te, Bank leh Dawr te a tlawh nghal bawk. Sangdingliana chuan Champhai District chhung a Cooperative Societies ten mipui rawng an bawlna chu tha a tih thu a sawi. Registrar hi Asst. Registrar, Cooperative Societies, Champhai Zaliankhuma leh a staff ten an lo dawng sawng a ni.Vawiin hian Biate tlangdung a Cooperative Societies te tlawh turin Champhai a chhuahsan ang.
MJA COORDINATION :
Vawiin chawhnu dar 2 hian Aizawla Press Club Conference hall-ah MJA Coordination Committee hmasa ber chu an thukhawm dawn.
Mizoram hmun hrang hranga MJA Member te inpawhtawnna tha zawk a awm theih nan kumin MJA Gen. Conf. a thu pass angin he Committee hi din a ni a. Gen. Hqrs. bakah District hrang hranga hruaitute kalkhawm chuan ro an rel dawn a. He hun hmang tur hian nimin khan MJA Champhai District President C. Lalhnunpuia chuan Aizawl a pan a ni.
THALFAVANG GAMES :
Kum tina an lo neih thin Samthang khuaa Thalfavang Games chu nimin khan Samthang khelmualah Er. C. Lalchawimawia, SDO PHED Khawbung WATSAN Sub-Division chuan a hawng.
Samthang khuaah hian kum 1978 atangin Thalfavang Games hi an lo hmang tan tawh a. Khawtual tlangval leh nula te chu Club hrang hrangah insiamin Football leh Volleyball hmangin inelna an nei thin a. He Games thalaite ruihtheihthila fihlim tur leh hriselna ngai pawimawh tura infuihna hun atan an hmang thin bawk.
RUANG CHHAR :
Nimin zing khan Chhaktiang Hotel, Venglai ah Zothansanga Varte (26) s/o Varremsiama, Aizawl Bungkawn chu a room-ah thia chhar a ni. Zothansanga hi a nutei Lalthanpuii Aizawl Venghlui ah a cheng a, amah hi ruihhlo ti thin nia hriat a ni bawk. Police lam ten tih tur tul ang an tih zawh hnuah a ruang hi Aizawl panpui a ni.
VAWIIN DINHMUN :
MIZOFED POL (Tuialhthei) Ph :8414965293
(Mon – Sat :- 6:00 AM – 7:00 PM) (Sunday :- 12:00 Noon – 3:00 PM)
Petrol : Nil (Rs. 60.17/litre)
A lo thlen beisei a ni a, a lo thlen chuan Tanky Full a pek tur a ni.
Diesel : Free Sale (Rs. 50.20/litre)
MIZOFED LPG (Gas)
(Vawiina an semna hmun)
NIL
Comments are closed.