Thawhtanni zana Zokhawthar panna kawng (Champhai District Park peng) a Champhai Police Duty ten Zokhawthar atanga Aizawl kal tur Maxi Cab khalhtu pakhat Kaphnuna (28) s/o PC Lalzuiliana, Champhai Vengsang hnen atanga Rangkachak Rs. 9.960 an man chunizan hmasa khan Champhai Customs Preventive Force kutah hlan a ni.
Nizan hmasa khan CHamphai Police Station ah Champhai District Addl. SP Lalbiakkila chuan heng rangkachak kg 9.960, Champhai khawpui chhunga rangkachak hlutna chhut a Rs. 32,200,680.00 man hi Champhai Customs Preventive Force kutah hlanin, Rangkachak neitu a puh Zohmahruaia s/o H. Chhunga (L) Zokhawthar pawh hlan nghal a ni. Champhai Customs Preventive Force hian thubuai Section 104 & 112 of Customs Act 1962 tlawhchhanin a thubuai siam sak a. Maxi Cab khalhtu erawh Release Bond ziak a chhuah zalen anih bakah Maxi Cab hren mek pawh chhuah a ni bawk.
Champhai Police hotute sawi danin, Rangkachak man tak hi Zohmahruaia, Zokhawthar khua chuan Excavator (JCB) Part ni a sawiin, Zokhawthar to Aizawl Maxi Cab Service khalhtu hnenah Aizawl a kengthla turin a thawn a. He rangkachak (Biscuit shape 60 pieces) hi Zohmahruaia hian Zokhawmawi (Myanmar) a Hote pakhat a cheng Myanmar mi Kusawon-a hnen atanga a lak chhawn a nih thu leh Aizawl a thawn turin JCB Part anga Maxi Cab pakhat a phurh tir thu Police te hnenah a sawi. He inhlan chhawn hunah hian Champhai SDPO leh Police Officer te antel bakah Champhai Land Customs leh Preventive Force hotute an tel bawk.
DUTY LEH TA :
Champhai to Zokhawthar Maxi Cab Welfare te chuan nimin atang khan tiam chin awm lovin Zonunsanga huan hnai zawkah an Duty chhunzawm leh. Tarlan tawh angin Champhai to Zokhawthar Sumo Service te chu DTO in Sawrkar rate Rs. 67 a tlan tura a tih hnuah nizan khan Committee neiin Duty chhunzawm leh an rel a. Nizan atang khan Zokhawthar Sumo Champhai lam pan te chu an lo dang chhunzawm leh a, Champhai to Zokhawthar Maxi Cab Welfare hruaitute chuan nimin vek khan DTO chu a pisa ah hmuin an rate chungchang an sawipui a, DTO chuan an rate hlui Rs. 100 a tlan tura a duh thu a lo hrilh a, an rate chungchangah hma an la sawn theih loh avangin Duty chhunzawm zel an rel a. Remchang hmasa berah an rate hlui Rs. 100 a an tlan theih dawn leh dawn loh sawi hovin an thukhawm dawn a ni.
NLUP KUTPUI :
Vawiin hian Champhai ah NLUP Kut 2018 hman ani dawn. NLUP Kut 2018 hi Champhai Kahrawt Community Hall ah leh VANIS Hall ah te neih ani ang a, he hunah hian NLUP tharchhuah thlai, thei, sangha, sial sarep leh industries hnuaia thilsiamte man tlawm zawk a lei theih turin pho chhuah a ni ang a. Mipui te tan dawr theih a hawn a nih dawn bakah NLUP hlawhtlinna Video Show leh Photo Exhibition a awm bawk ang a, NLUP Implementing Board (NIB) Mizoram chuan mipui te he hunah hian tel theuh turin an sawm a ni.
PURUNVAR LEH SEN :
Krishi Vigyan Kendra (KVK) Champhai District, Khawzawl chuan nimin khan Khawzawl a khawpui chhungah Khawzawl a kuthnathawktute thar chhuah Purunsen leh Purunvar mipuite lei theih tura phochhuahna an buaitsaih. Mizoram Sawrkar Flagship Prog. NEDP sum hmangin KVK Khawzawl hian Khawzawl khawpui chhunga loneitu chhungkaw 15 chu Purunsen (Agri Found Light Red Variety) chintirin heng mite hian hlawhtling takin an thar chhuak a. Tin, Purunvar chi tha chi (G-282) chu loneitu chhungkaw 30 hnenah chintirin hei pawh hi hlawhtling takin loneitute hian an thar chhuak a ni.
An hnuaia loneitute Purunthar chhuah mipuite lei thei tura phochhuahna, Onion & Garlic Rally hi KVK Champhai District Senior Scientist & Head Dr Vanlalhruaia Hnamte in kaihruaiin a thawhpui Scientist ten an tawiawm a. Rally neih rual hian KVK Khawzawl hian kan rama awlsam tak leh hlawk taka thar chhuah thei thlaite hi phailam thar chhuah rinchhan lovin kan ramah ching uar ve turin infuihna Awareness Programme an buatsaih nghal a ni.
POLITICAL TRAINING NEI :
Nimin khan Champhai North & South Block Mizo National Front Party te chuan PD Sena Hall, Kanan Veng ah Political Training an nei a, Party President Pu Zoramthanga chuan khuallian niin a hmanpui.
Thusawiin khuallian chuan Congress in kum 10 an sawrkar chhungin MNF in bul a lo tan tawh te chu an ti chul vek a ni a ti a, Hnahlan Winnery pawh tunah chuan inghhahna tlak lovah a chhuah mek a ni a ti. MNF kan sawrkar chuan Mizoram kawng siam thar leh siam that hi kan hnapui ber pakhat a ni dawn a ni a ti a, thingtlang kilkhawr ber thlenga kawngpui tha tak neih tir hi kan tum ber a ni dawn a ni a ti.
Pu Zoramthanga chuan MNF hi a sawrkar a nih chuan kan ram development leh economics hi siam that a ni ang a, khawi hmunah mah sawrkar In lianpui pui hman lova awm leh hman tlak lova awm te, eng atana sak nge a nih tih pawh hriat loh te hi a bo tawh ang a, kan ram in a mamawh chauh siam a ni ang a ti.
Tunlai thil thleng mek te thlirin Opposition lian ber Congress hian sawrkar leh turin beiseina an nei tawh lo a ti a, MNF hun a lo thleng leh dawn a, lo chhuahsan tawh te pawh kir leh a, ram siam tha tlang tur a a duh thu a sawi a ni.
Kan rama bungraw lo lut tur tam ber chu Khawchhak lam atanga lo kal a nih avangin Zokhawthar Triau ah International Trade hawn tum a nih thu a sawi a, Passport leh Visa hmanga indawr tawnna siam a ni dawn a ni a ti a, sumdawnna hmunpui berah siam a tum thu a tarlang a ni.
MNF ral kap thin chu remna siam tu a lo ni tawh a, chu chu kan ram thenawm ram hrang hrang te pawhin hmang tangkaiin hel ho nena remna siamtu a tan MNF hi hman a ni thin a ni a ti a, Pathian thu ang zelin kan kal mek a, kan ram pawhin a mamawh ber chu MNF hi a ni a ti a, kalkhawm te chu kan ram tana theih tawp chhuaha ken pen turin duhsakna a hlan a ni.
He hun hi Pu R. Thangseia, President Champhai South Block chuan kaihhruai in Gen. Hqrs atanga lo kal te hnen atangin inhmelhriattirna neih niin an hnen atangin thusawi ngaihthlak a ni bawk.
Political Training hi Pu Zohlira, President Champhai North Block chuan lawmthu sawiin a khar a ni
Comments are closed.