CHAWLHKAR KHAT CHHUNG WORKSHOP

Get real time updates directly on you device, subscribe now.

CHAWLHKAR KHAT CHHUNG WORKSHOP :
Chawlhkar khat awh tur International Workshop on Recent Advances in Academics chu nimin khan Prof. KRS
Sambasiva Rao, Vice Chancellor, Mizoram University chuan Government Champhai College Multipurpose Hall-ah a hawng. He hunah hian Prof. Lalnundanga, Registrar, Mizoram University chu khual zahawm a ni.
Hawnna huna Khual lian Prof. KRS Sambasiva Rao chuan Champhai leh a chhehvel chu theihna sang tak nei, ram pawn lam mite tan pawha zirna tha zawk pan theihna tura hmun rem leh duhawm tak a ni, a ti a. Champhai College hmasawnna fakin College changtlung zawk, nakin zela Campus lian leh University Campus thleng pawha siam a nih theihna tura tan lak a ngaih thu leh, lo inhmakhua lawk nan PG Course Subject thenkhat atanga tan tum turin a fuih a. Thawktu leh Zirlaite chu College tha leh thalo tehna NAAC Assesment kum 2021 a neih tur hrereng chunga tehfung hrang hrangte hlen tum tur leh hamthatna tam zawk dawng thei tura rilru seng turin a chah.
Khual lian chuan Mizoram University chu India rama University tha berte zinga mi a nih tawh thu sawiin, tun hnaiah MZU chu chak takin a thang tih sawiin, hetiang zela a thang a nih chuan tun atanga hun reiloteah chuan India rama University tha zual 25 zingah a tel ve ngei a ring tih a sawi bawk. MZU chuan tun October thla chhung ringawt pawh hian Project 300 chuangah hmalak tuma dilna a siam thu leh hetiang hi India ram University dangah pawh a awm ngai loh thu a sawi a. Zirlaite chu rilru leh ngaihtuahna zau zawk pu chunga a taka hman nghal mai theih tur thiamna chhawrtlak tak zirchhuah tum turin a fuih a. Harsatna leh mamawh an neih changin zirtirtu leh thuneitu sang zawk thlenga hrilh hreh lo turin a chah bawk a. MZU Vice Chancellor chuan Government Champhai College kalzelna turah duhsakna hlanin College campus tihlen leh than zelna
tura mamawh an neihah a theihna ang a puih a inhuam reng tih a sawi bawk.
Prof. Lalnundanga, Registrar, Mizoram University chuan zirna sang zawkah chuan zir thiamna hrang hrangah tanho a ngaih thu sawiin, zirbingna research atanga hmuhchhuahte Lehkhabua chhuan mai duh tawk lo va, a hmang tangkai tur dik tak mipuiten a taka an chhawr tangkai theih a tul zawk tih a sawi a. Mahni kutkawih leh thiamna neih hmanga eizawnna mumal tak neih duhte puitu tur Incubation Centre 4 lai MZU-ah siam a nih thu sawiin, thiamna kawng thlan ang zelin mithiamte kaihhruaiin eizawnna puitling nei tura puih thin an ni, a ti bawk.
Hawnna hun hi L.Khuma Varte, Asso. Prof, Geography Dept, Govt. Champhai College chuan a kaihruai a. P.Lalhmingliana, Principal Govt. Champhai College-in kalkhawmte lawmna thu a sawi a. C.Chalthanga, Asso. Prof & Head English Dept,GCC in Workshop neih a nih chhan tlangpui a sawi a. Thangmawii, Asso. Prof, Education Dept, GCC in lawmthu sawiin hawnna hun hi a khar a ni.
Workshop hi RUSA 2.0 Equity Intiatives Fund bultum niin, IQAC Govt. Champhai College buatsaih a ni a. October Ni 28 atanga November Ni 1, 2019 chhung hian zirhona hi Govt. Champhai College Seminar Hall-a neih tur niin, hemi hun chhung hian India leh Myanmar atanga lokal sawm bik
mithiamte hnen atangin tunlai thiamna hmanga zirna hmasawn dan te zirchianna, thupui hrang hrang hmangin neih thin a ni ang.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More