Khawpuia cheng mahni puala chenna in neilote tana insak tanpuina Scheme Pradhan Mantri Awas Yojana-Housing for All (PMAY-HFA Urban) kaltlanga hamthatna dawng tur thlangtu District Screening Committee on PMAY-Housing for All (Urban), Champhai District chu nimin (24.11.2021) khan an Chairman Bawrhsap Pi Maria C.T Zuali hovin I&PR Conference Hall, CHANEM-ah an thukhawm.
Thukhawm chuan PMAY-HFA hnuaia insak tanpuina pawisa dawng vek tawh tun thlenga la sa si lo te chungchang an ngaihtuah a, kumin chhung ngaihchan leh phawt nise, kumin chhunga hmalakna a awm lo a nih chuan dan angin an chungah hremna lekkawh nise tiin an rel a ni.
Champhai khawpui chhungah PMAY-HFA hnuaiah hian in sak tanpuina pawisa dawng zet tawh vawiin thlenga hma la la lo 56 an awm a, UD&PA Department chuan heng mi 56 te hi an inah kal chilhin an dinhmunte zirchian a ni a, in sa lo te hian an harsatnate lo thlen mah se, an chhuanlamte hi chhuan lam tlinga ngaih loh tam tak an awm thu tarlan a ni a. In sak tanpuina dawngte hian hma an la thei lo a nih chuan an pawisa dawn zawng zawngte pek let leh vek tur a nih angin ba thinna lehkha pawh pek chhuah tawh a nih thu tarlan a ni a. Pawisa dawng si, sa leh si lo te avangin tangpuina pek chhuah kawngah harsatna a awm thu tarlan a ni bawk.
District Screening Committee on PMAY-Housing for All (Urban), Champhai District thutkhawmah hian Pi R.Lalnunkimi, DUDO & Member Secretary, District Screening Committee bakah member dangte leh sawmbikte an tel a ni.
Comments are closed.