Chhungkua 154 Home Quarantine mek

Get real time updates directly on you device, subscribe now.

Lengteng Bialtu MLA L. Thangmawia chuan nimin khan a bial chhungah Covid 19 laka invenna tur hmanrua a sem chhuak.
MLA hian a bial chhung Kawlkulh khua-a Covid-19 hri kai 5 hmuh chhuah a nih tak avang leh in 154 lai home quarantine mek an nih avangin Kawlkulh leh a chheh vel khuate a tlawh a. Kawlkulh PHC-a hman turin RAgT Test Kid 100 leh Covid 19 laka invenna tur hmanrua chi hrang hrang a pe a. Kawlkulh Joint VLTF tan invenna hmanrua mamawh hrang hrang bakah, Rs 50,000 a hlan a. Lengteng bial CHC, PHC leh tul danga hman turin, RAgT test kit 250, hri leng laka invenna tur leh mamawh hrang hrang te Ngopa SDO (C) a hlan bawk.
MLA hian a bial khaw hrang hrang Dulte, Puilo, Tawitawkawn, Changzawl, Hliappui, Saichal leh Pawlrang te tlawhin Hand sanitizer, Mask leh Glove a pe a, an harsatna tawhte a sawipui a, rim taka hri dona atana an thawhnaah lawmthu a hrilh bawk.
Nimin vek khan MLA L.Thangmawia hian, National highway No-6 (Seling – Champhai) kawng sial mektu Dulte khua a inkulh mek ANUSHA Projects te tlawh nghalin, General Manager Ram Kumar hnenah Corporate Social Responsibility (CSR) atanga Kawlkulh PHC tan X-Ray khawl leisak turin a ngen a. ANUSHA Projects hotute chuan MLA ngenna hi lo ngai pawimawhin, a rang lama ziaka thlen tur leh Kawlkulh PHC a hman tur X-Ray bakah ECG khawl an leisak tur thu an lo hrilh a. MLA hian ziaka ngenna a thehluh thuai tur thu leh a ngenna te tihhlawhtlin sak an tum avanga lawmthu sawiin, Projects Manager leh a thawhpui te chu bial aiawhin lawmthu a hrilh bawk.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More