CHHUNGKUA ENKAWL THA CHUAN KHAWTLANG LEH RAM AN SIAMTHA

Get real time updates directly on you device, subscribe now.

Champhai Vengthar Branch MHIP Silver Jubilee (1996-2021) lawmna hun Vengthar Community Hall-a buatsaih chu nimin chawhma khan Law & Judicial Minister Pu T.J. Lalnuntluanga chuan khuallian niin a hmanpui. MHIP In, Thingsulthliah kawna Silver Jubilee puala lungphun siam a hawng bawk.
Khuallian Pu T.J. Lalnuntluanga chuan Champhai Vengthar Branch MHIP in kum 25 na hmel hmua Silver Jubilee lawmna hun a buatsaih thei chu a lawmpui thu sawiin, ni chhinchhiah tlak tak lawmna hun hmang tura kalkhawmte Jubilee pualin chibai a buk a. Khawvel ram hrang hrang leh Mizoramah ngei pawh hmeichhiate dinhmun chawikan kawnga hmalak a nih mek zel laiin Mizoramin hmeichhiate tana hma la a an dinhmun chawikanna tura thahnemngai taka thawktu pawl zahawm leh ropui tak MHIP kan nei hi kan vanneih bikna a ni, a ti a. MHIP te hian zonun zemawi, hnam chin dan leh tih thin dante an chhawmnung zel a, incheina chungchangah inkaihhruaina an nei tha thin hle a, hei hian hnam dangte lakah min chawimawiin thang tharte thinlungah mahni hnam zahpui lohna leh hnam ziarang kal san lohna a tuh thin a ni, a ti bawk.
Chhungkua kan dam tlang em tih kan inzawha kan inenfiah fo a tul thu sawiin, chhungkaw damna leh hlimna tak tak chu nu te kutah thui tak a innghat a, chhanna nemin thinur a tikiang thin avangin chhungtinin chun nunnem uapna kan mamawh hle a ni, a ti a. Nu te chu fate intodelh tura zirtir te, Pathian thu nena enkawl leh nun kawngdik kawhhmuh leh zirtir kawngah tanla zual deuh deuh tura sawmin, chhungkaw inenkawlna felloin nghawng thalo thui tak a neih thu sawiin, chhungkaw inenkawl tha leh fuh chuan khawtlang leh ram nuam a siam thin a ni, a ti a. MHIP member kalkhawmte chu ram leh hnam hmangaihna tak tak nei chunga hnam ziarang leh chin dante humhalhtu ni zel tura a duh thu sawiin, ram leh hnam hmakhua hun bi thui tak chu nu te kutah a innghah tlat avangin mi pawimawh tak an nih thu a sawi a. Hnathawhna leh thil tha tihna hrang hrang hnarkaitute zinga hmeichhiate an tam thin leh chhungkaw khaidingtu thlenga an awm thin chu lawmawm tiin hmuh nuam a tih thu a sawi bawk.
Law & Judicial Minister chuan sawrkar bul ber chu chhungkua a nih thu tarlangin, chhungkaw rorelna a fuh loh chuan chhungkua a keh chhia a, khawtlang leh ramin a tawrh phah ta thin a ni, a ti a. Chhungkua a hmun pawimawh changtu nu te chu an fa ten nun kawng dik an zawh theihna turin an naupan lai atanga uap tam tura fuihin, fa leh pasalte mamawh laia nu ber a lo awm hnai thin hian chhungkaw damna leh hlimna a thlen thin a ni, a ti a. Intodelh tawk nih tum ila, chhungkaw hlim siam tum ila, chu chuan Lalpaah kan chhungkua a ti dam ang tih ka ring tlat a, chhungkaw nuam, khawtlang nuam leh hlu tak siam kawngah nu te an pawimawh hle a ni, a ti a. MHIP Vengthar Branch chu khawtlang leh ram tana malsawmna thlentu pawl zahawm tak a lo nih zel theih nan duhsakna a hlan nghal bawk a ni.
Silver Jubilee lawmna hun hi Pi K.Lalsawmkimi, President, Vengthar Branch MHIP chuan a kaihhruai a. Pi Thangzuali, Committee Member-in hunserh a hman hnuah Tv. Lalroruata, Adviser kaihhruaiin member boralte sunna hun hman a ni a. Secretary Pi Mary Ngaihthangi hnen atangin report ngaihthlak a ni a. Pi P.C Lalhmachhuani, Ex-President, Sub-Hqrs. MHIP Champhaiin Souvenir a tlangzarh a. Pi Vanramronghaki, Asst. Secretary kaihhruaiin hruaitu ni tawh zawng zawngte hnenah chawimawina thuziak cheimawi hlan a ni a. Sub-Hqrs. MHIP Champhai aiawhin Pi L.H Lalrengpuiin lawmpuina thu a sawi bawk.
Chawhnu lamah Pi H.Zosangpuii, Vice President kaihhruaiin intihsiakna hrang hrangte neih niin, intihhlimna hunte buatsaih a ni bawk.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More