Ni thum awh tur, Hmun danga hnathawka eizawng, Covid-19 hri leng vanga lo haw te tan nimin khan Enterpreneur Development training buatsaih sak an ni a, Pi Maria CT Zuali, District Bawrhsap chuan khuallian niin a hmanpui.
Thusawiin khuallian chuan hnamdang te chuan an naupan lai atang tawhin sumdawnna kawngah an lo inzirtir nasat thu sawiin hmel lan dan te leh indawr dan te an zir nasat thu a sawi a, engkawngah pawh eizawnna kawmg an zawhin hlawhtlinna an chang thin tih sawiin Champhai ah pawh eizawnna tlak tam tak a awm thu tarlangin kan eizawnna chu engpawh lo ni se, hlawhtling tur chuan thawhrimna leh taimakna bakah tih takzet na a ngaih thu a sawi a, hna ho te pawh nise kan theih tawpa kan tan chuan kan hlawhtlinpui thei a, kan dinchhuahpui thei a ni tih a sawi bawk.
Mizo ten lehkha zir ngawr ngawr leh sawrkar hna thawh ngawr ngawr kan suangtuah leh kan tum a nih avangin mi tam takin an tihfuh loh thu a sawi a, mahni kutkawih hmang ngeia eizawnna kan siam thiam a ngai tih tarlangin mi thawhchhuahsa atanga hlawkna lo tel tum ngawt ni lova, mahni ngeia dingchhuak thei tura kan themthiam thil te kan hman tangkai a tul tih a sawi a, sawrkar hna in mi zawng zawng a daih loh avangin kut hnathawk chung pawhin hlawhtlinna tam tak a awm tih sawiin kut hnathawh zak thin te chu an dingchhuak ngai lo tih a tarlang bawk.
Eng hna pawh thawk ila, sawrkar hna emaw, kut hnathawk emaw pawh ni ila, kan thawh theih ang ang chu taima tak leh tih tak takna nen kan thawh phawt chuan hlawhtlinna kan chang ngei dawn tih hre reng tura chah in kalkhawm te chu duhsakna a hlan a ni.
He hun hi Pu Lalrinawma, Functional Manager DIC, Champhai chuan kaihhruaiin kum 2020 March thla atanga hripui leng Mizoram mi leh sa, ram pawn a eizawng, buaina tawk a, hna thawk chhunzawm thei lova Mizoram a rawn kir te chu sawrkar in a ngai pawimawh tih sawiin anmahnia eizawnna kawng an zawn theih na tura Enterpreneur Development Training, Mizoram District 11 ah MYC, Commerce & Industries Department, EDC leh Planning & Implementation Department te tangkawpin an buatsaih a nih thu a sawi.
Resource person Lalthanpuia, Associate Professor, Govt. Champhai College & Master Trainer, EDS hnen atangin eizawnna kawng an zawh zelna tura tul leh pawimawh hrang hrang te a lem nen entira ngaihthlak chhunzawm a ni.
Champhai District ah hmun danga hnathawk a eizawng mi 164 an awm a, mi 50 te tan he hun hi buatsaih a nih avangin thlan bik te an kalkhawm a ni.
Comments are closed.