COVID-19 LAKA MIPUI HIM DAN TUR SAWIHO

Get real time updates directly on you device, subscribe now.

Covid-19 hripui leng thar laka mipuite an him tlan nana hmalak dan tur chungchang relin nimin chawhnu dar 3:00 khan Champhai District Bawrhsap James Lalrinchhana, Chairman, District Disaster Management Authority (DDMA) hovin DC Conference Hall-ah thukhawm a ni.
Champhai District Disaster Management Authority Chairman, James Lalrinchhana chuan hrileng a zual leh tak avangin fimkhur a tul zual thu sawiin, inkaihhruaina siamah District leh mite nunna hlu tak a innghah avangin ngaihtuahna fim sen a tul a ni, a ti a. Dinhmun leh nihnate chian a tul thu sawiin, nitin khawsak leh nunphung pangngai tibahlah lova inkaihhruaina siam a tul thu a sawi bawk.
He hunah hian Covid-19 hrileng dinhmunte thlir ho a ni a, hrileng avanga harsatna awm theite thlir chungin inpuahchahna kalpui dan turte sawiho a ni a. CCC leh DCHC tharthawh leh a tul thulha hmalak tulte pawh ngaihtuahho niin, hmanraw mamawh leh tul angte CMO in DDMA ah thehlut se, mamawhte State sawrkar atanga sum dawn atanga lei ni se tih a ni a. CCC, DCHC leh TrueNat Lab-a thawktu mamawh leh a zatte sawiho niin, thuneitu sang zawk hnenah DDMA hmingin dilna thlen ni se tih a ni a. Covid-19 laka him nana inkaihhruaina duan, Covid-19 Appropriate Behaviour (CAB) zawm tha tura ngenna siam ni se, sawrkar pisa-ahte CAB khauh taka kenkawh ni se tih a ni bawk a. DDMA Champhai chuan Champhai District mipuite chu hrileng laka him tlan nan Covid-19 inkaihhruaina Covid-19 Appropriate Behaviour tha taka zawm hram hram turin a ngen a ni.
CMO Champhai Dr. R. Lianmawia tarlan danin nikum December ni 31, 2021 thlenga Covid test 60142 atangin hrikai 6656 hmuhchhuah a ni a. January ni 1, 2022 atanga nimin July ni 13, 2022 thenga test 16790 neih atangin hrikai hmuhchhuah 4105 an awm a. Nimin thlenga Champhai District-a hrikai 10761 hmuhchhuah tawh zawng zawng zat chu a ni a, hri avanga thi mi 32 an awm tawh bawk.
Hun rei tak hrikai hmuh chhuah a nih tawh loh hnuah rinhlelh thilah July ni 9, 2022 khan District Hospital Champhai OPD a inentir mi 50 te endikna atangin mi 13 ten hri an kai tih finfiah a ni a, hemi ni atang hian nitin test kalpui nghal niin nimin July ni 13 thleng khan test 184 neih tawh niin, heng atang hian mi 43 ten hri an kai tih hmuhchhuah a ni.

Hetihlai hian nimin khan Champhaiah hri kai mi 4 hmuh chhuah belh a ni a, nimin khan enkawl dam mi 6 an chhuak thung.
Nimina hri kai hmuhchhuahte hi Rapid Antigen Test hmanga hmuhchhuah niin Kahrawt, Bethel, Kanan leh Kelkangah te mi 1 theuh hmuhchhuah a ni. Hetihlai hian enkawl dam mi 6 an chhuak thung a, enkawl dam chhuakte hi Hmunhmelthaah mi 3, Tlangsamah mi 2 leh Zokhawtharah pakhat an ni. Heti hian hri len thar leh hnuah Champhaiah hri kai mi 47 hmuh chhuah tawh a ni a, enkawl dam mi 6 chhuak tawhin mi 41 te la enkawl mek an ni. Champhai District chhunga hri kai hmuhchhuah tawh zawng zawng chu mi 10,810 an tling tawh a, an zinga 10,737 enkawl dam tawh an ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More