Covid-19 Vaccine pek chhuah dan tur ngaihtuah

Nimin khan Covid-19 vaccine pek dan tur chungchang ngaihtuahin
Champhai District Task Force for Immunization (DTFI) chu an Chairman Maria CT Zuali hoin DC Conference Hall-ah an thukhawm.
Bawrhsap Maria CT Zuali chuan Covid-19 hripui dona kawnga vaccine pek hmasak tur ral hma tawng – frontline worker te chu a kimchang thei ang bera a rang lama database siam a, sawrkar laipuia thehluh a ngai tih
a sawi a.
Dr. R.Lianmawia, CMO, Champhai chuan Undivided Champhai district chhunga Health Care Worker 1,269-te database siama thehluh a nih tawh thu sawiin, vaccine nihphungte leh dawn zat turte hriat mai theih la ni
rih lo mah se, vaccine dawn huna chetlak dan turte thlirin, thawktute
pawh zirtirna pek thuai tum a nih thu a sawi bawk a. Thawktu leh hmaraw neihsa hmanga vaccine pek chu buaipui theih an inbeisei thu leh, immunization schedule pangngai anga kalpui a nih tur thu a sawi bawk.
He hunah hian Covid-19 hri danna vaccine a rawn thlen huna hmalak dan tur hrang hrangte sawi ho a ni a. Tum khatah mi zawng zawng pek nghal vek theih a nih dawn loh avangin, vaccine rawn thleng hmasa chu ralhma tawnga dingte pek ni se tiin rel a ni a, pek hmasak tur tul zual bikte ngaihtuah ho a ni a. Health Care Worker mi 1,269-te bakah, frontline worker ngaih pawimawh zualte DC Office leh SP Office-in buatsaihin,
CMO Office, Champhai-ah pe se, anni-in a tul anga database mumal tak siamin, thuneitu sang zawk hnenah thehlut se, an ti.
Vaccine pekchhuahna tur inpuahchahna atan hian tun dinhmunah CMO Champhai bial chhungah Vaccine Facilities Centre 18 leh Vaccine Session Site 67-te ruahman a ni.