Nimin khan Covid-19 avangin Champhai a DCHC-ah mi 2 an thi a, nimin vek khan Champhai District chhungah hri kai mi 31 hmuhchhuah belh leh ni bawk in Champhai District chhunga hri kai hmuhchhuah chu mi 5000 chuang an tling tawh a ni.
Nimin zing khan Pu R. Laltanpuia (75), Champhai Kahrawt Veng chu Dedicated Covid Health Centre-ah Covid-19 avangin a thi a. Pu R. Laltanpuia hi October ni 21 khan hri a kai tih hmuhchhuah a ni a, amah hi natna dang nei tel ani bawk a, a nunna chhan tuma theihtawp chhuah anih laiin nimin zing dar 8:30 khan a boral ta a ni.
Nimin chawhma dar 10:55 khan Pu Vumkhawthanga (72), Champhai Bethel Veng chu hri avangin a thi bawk a. Pu Vumkhawthanga hi natna dang nei tel niin October ni 22 khan hri a kai tih hmuhchhuah a ni.
Nimin a thi mi 2 te nen DCHC Champhai-ah hri avanga thi mi 4 an awm tawh a, Champhai District chhunga hri kai hmuhchhuah zingah mi 10 an thi tawh a, hmun danga thi mi 5 te nen Champhai District mi leh sa hri avanga thi mi 15 an tling tawh a ni. Champhai District chhunga hri kai hmuhchhuah zinga nunna chan zat hi za zela chhutin 0.19 a ni.
Hetihlai hian nimin khan Champhai District chhungah hri kai mi 31 hmuhchhuah belh leh a ni a, Rapid Antigen Test hmangin hri kai Electric Veng, Bethel leh Kanan Vengah mi 4 theuh; Kahrawt, Vengsang leh Dungtlang mi 3 theuh; Vengthlang, Zion Veng leh Tlangsam-ah mi 2 theuh; Venglai, Zotlang, Vengthlang North leh Farkawn-ah mi 1 theuh hmuhchhuah an ni a.
Nizan hmasa khan TrueNat hmangin hri kai mi 15 hmuhchhuah a ni a, Kahrawt Vengah mi 5; Zotlang-ah mi 3; Kanan, Zion Veng leh Hmunhmeltha-ah mi 2 theuh leh Vengsang-ah mi 1 te hmuhchhuah an ni.
Heti hian Champhai District chhungah hri kai hmuhchhuah chu mi 5017 an tling tawh a, mi 4464 te enkawl dam an ni tawh a, hri kai enkawl lai mi 543 an la awm mek a ni.
Comments are closed.