Champhai district-ah Covid-19 hri kai mi 106 hmuh chhuah belh leh an ni.
Nimin khan Rapid Antigen Test hmangin hri kai mi 71 hmuh chhuah belh leh a ni a. Ngur khuaah Rapid Antigen Test hmanga Sample endik 99 atangin hri kai mi 42 hmuh chhuah a ni a, Sample endik atanga chhutin hri kai hmuh chhuah zat hi za zela 42.42 a ni a. Hri kai hmuh chhuah te hi Govt Primary School leh Middle School-a 4C-ah te dah luh nghal an ni.
Ngur khua hi hri kai awm lohna khua an nih avangin Zirna a pangngaia chhunzawm a nih bakah, inkhawm te kalpui tawh a ni a. Hetia hri kai hmuh chhuah an awm tak avang hian zirna in te khar leh niin, Biak ina inkhawm
pawh tihtawp rih a ni.
Rapid Antigen Test hmangin Kanan vengah mi 6, Zion Vengah 5, Bethelah 4, Venglaiah 7; Jail Veng, Zokhawthar leh Vengthlangah te 2 theuh leh Vapar-ah pakhat hmuh chhuah an ni a, nimina hri kai hmuhchhuah zinga a tam zawkte hi hri kaina chin hriat loh an ni.
Nizan hmasa khan TrueNat hmangin hri kai mi 35 hmuh chhuah leh a ni bawk a. Zion Vengah mi 24, Venglai leh Vengsangah 3 ve ve, Kahrawt leh Ngurah 2 ve ve leh Vengthlangah pakhat hmuh chhuah an ni. Heti hian Champhai District chhunga hri kai hmuchhuah chu 2,613 an tling tawh a.
Nimin khan enkawl dam mi 55 te’n enkawlna hmun an chhuahsan a, hri kai enkawl dam hi 2,087 awm tawh a. Hri kai hmuh chhuah zat atanga chhutin za zela 79.86 a ni a, hri kai enkawl lai hi 524 an la awm mek.
Dedicated Covid Health Centre (DCHC)-ah hri vei 8 enkawl mek niin, an zinga mi 4 te chu Oxygen pek ngai an ni a. Mi 4 natna benvawn nei awmin, naupang pakhat leh Nau nei pakhat an awm mek bawk.
Comments are closed.