Champhai Town Multipurpose Co-operative Societies Limited (CTM-PACS)hmachhawp lian tak Vavu Dil Project hnuaia hmalakna hrang hrang – Bamboo Vinegar siamna, Vawk Farm leh Tui Verh-te chu nimin chawhnu khan Champhai District Bawrhsap Maria CT Zuali’n a hawng.
Maria CT Zuali chuan ram changkang leh ropui zawkah Society intelkhawm chak tak a awm thin thu sawiin, Champhaia hetiang kan nei hi a vanneihthlak hle a ni, a ti a. Neitu nihna thinlung pu chunga a hmunhma leh sum awm angte thiam taka hmang tangkai a, hmalakna nasa tak CTM-PACS in a nei chu fakawm a tih thu a sawi a. District Administration anga tanpui theihna zawnah puih a inhuam tih a sawi bawk.
CTM-PACS kaltlanga chhungkaw eng emaw zatin eizawnna an nei chu entawntlak a tih thu sawiin, vawilehkhatah hlawhtlinnate hmuh ni lo mah se a bulthum atanga tana zirna, dawr, farm leh thil dangte hmanga bultan a ni chu nakin lawka chhawrnahawm tak tur a ni, a ti a. India hnampa Mahatma Gandhi-a’n kuthnathawh a chawisan anga zirlaite leh Member-te zinga kuthnathawh chawimawi kawnga CTM-PACS te hmathlir chu ngaihsanawm a tih thu sawiin, an kal zelna turah duhsakna a hlan a ni.
He hun hi HS Vanlalfakzuala, Chairman, CTM-PACS chuan a kaihruai a. Bamboo Vinegar siamna khawl bunfel nan hian Pradhan Mantri Van Dhan Yojana (PMVDY),
Implementing Agency Co-operation Department atangin sum Rs. Nuai 15 dawn a ni a.
Vawk 7-a Vawk Farm bultan chhin chu hlawhtling hle a hriat a nih hnuah, Society sumkhawl atangin Rs. Nuai 10 hmangin hmalak tan a ni a. Tunah hian Vawkpui 10, Vawkpa 2 leh Vawk note 27 an enkawl mek a. Vawk vulh atang hian sumfai Rs. 2,36,395/- an lalut tawh a, ramdang atanga Vawk lalut lo va, tualchhung leh State pum mamawh khawp hralhchhuah tham thar tuma hmalak mek a ni.
Vavu Dil Project kaltlanga hmalaknate chak zawka thawh a nih theihna tur kawnga pawimawh tak Tui verh hna hi Society sum, Agriculture Department leh Van Dhan Yojana tanpuina Rs. 2,13,635 kaltlanga siam a ni a. Agriculture Department hnuai atang vekin tui dahkhawlna, Tank 3 siam zawh a ni tawh a, Society in tui a hralhchhuah mek bawk.
Comments are closed.