Champhai District Addl.DC Henry C. Lalrawnkima chuan Champhai District chhunga ramri daido khua, khaw 13 tlawh chhuakin, Chief Minister Relief Fund leh SDRF atanga sum an pawh khawm hmangin, VLTF ten hripui an dona kawnga a tul apianga an hman turin Pawisa fai leh hmanrua te a pe a. Lalnunfela Chawngthu SDO (S) in Melbuk VLTF te a pe bawk a, Addl. DC hi Lalhruaimawia, District Organiser, DM&R in
a tawiawm a ni.
Khaw 14 VLTF te hnenah hian Pawisa fai Cheng 83,000 leh PPE Set 25, Kutkawr 780, Hmaituamna 700, Silpaulin 28, Kutsilna 15
leh Solar Emrgency Light 2 pek chhuah a ni a. Heng bakah hian Medical, Police leh Excise te hnenah PPE, Hmai tuamna, Kutkawr, kut silna leh disinfectant pek an ni tawh bawk.
VLTF hrang hrang a tlawhnaah Addl DC Henry C Lalrawnkima chuan thu sawiin, hrileng ven kawngah sawrkarin VLTF te chu a rin tawk thu leh, a innghahna ber a ni tih a sawi a. VLTF te hnathawhah Sawrkar a lawm hle tih sawiin, tan la sauh sauh tur leh hri laka kan him theihna tur a nih chuan tim miah lo leh khawng taka hma la turin a fuih a. Ramri
daido khuate chu Myanmar lam tan kawtkai pakhat an nih avangin tan la sauh sauh tura chahin, ramri kaltlanga mihring inkalpawh tur leh bungraw lutru tur ven kawngah tha thlah lova tang zel turin a chah bawk a. VLTF te chu thlei bik awm lo leh duhsak bik awm loa hma la turin a fuih bawk.
Comments are closed.