Champhai Police chuan The Mizoram (Containment and Prevention of COVID-19) Act, 2020 bawhzuiin May, 2020 atanga 4.2.2021 thleng khan he dan bawhchhia hi mi 2730 an man tawh a, an pawisa chawi hi Rs. 4,30,700/- niin, heng pawisa te hi dan in a sawi angin DC Champhai hnenah thehluh a ni.
Nimin Chawhma khan SP Office Chamber, Keifangtlangah Champhai SP Rex Zarzoliana Vanchhawng kaihhruaiin Champhai District Crime Review Meeting neih a ni a. SP Rex
Zarzoliana Vanchhawng chuan, Champhai Police te thawhho thatna vangin Champhai District chhunga Sawrkar Office fai ber lawmman SP Office in a dawng chu lawmawm a tih thu a sawi a.
Mizoram chhunga Covid 19 a darh zel lohna tura hma la tha ber te zinga Champhai District a tel te, Krismas leh kum thar vuakveta District chhungah buaina leh chetsualna lian tham a thleng lo te chu vanneihthlak a tih thu a sawi a. Mizoram Police zinga thawh hona that berna hmun nia a hriat thu leh Officer zingah chhawmdawl ngai leh hnaa awi ngai an awm lo chu lawmawm a tih thu a sawi a. Champhai District chhunga Police Station hrang hrangah hmasawnna hmuh tur tam tak a awm thu leh, ti changtlung zel tura hmalak zel a pawimawh tih a sawi bawk. He thutkhawma tarlan dan chuan, Kum 2019-ah IPC case ziahluh 91 awmin Kum 2020-ah 107 a awm a, Kum 2019 aiin 2020 chhunga IPC case register
zat hi 16-in a tam a. Kum 2019-ah Non IPC case ziahluh 90 awmin, Kum 2020 ah 53 a awm thung a, Non- IPC case register hi kum 2019 aiin 2020-ah 37 in a tlahniam a. Kum 2019 ah case ziah luh zawng zawng hi 181 awmin Kum 2020 ah 190 a awm thung a. Nikum khan hripui leng vangin sawrkar inkaihhruaina hrang hrang a siam bakah The Mizoram (Containment and Prevention of COVID-19) Act, 2020 a siam bawhzuiin Covid-19 kaihhnawih case ziahluh 50 a awm a, hei vang hian Kum 2019 aiin Kum 2020-ah IPC case ziahluh a tam phah tih tarlan a ni bawk.
Comments are closed.