Inrinni zan dar 8:00 pelh hnu khan Champhai District Bawrhsap C.T. Maria leh a Sorkar official pawimawhte, Farkawn tlangdunga an zin haw lamin Champhai atanga KM 19 vel, Kelkang daiah Dan lova Kuhva phur ru te hmu in an man a, an phurhte hlanthlak tira kawng sir a an dah tir chu, thalai rual ten an hal chhia ni a thudawn a ni.
Hemi chungchangah hian Lalhruaitluangi, Aizawl Chaltlang Lily veng nia inchhal chuan Champhai Police Station-ah FIR thehlutin a Truck 4, kuhva, quintal 120 vel phurtute chu Champhai bawrhsapin man sakin halral a nih chungchangah DC chungah a tul anga action la turin a ngen a ni.
Champhai Bawrhsap in a sawi dan chuan heng kuhva rote hi Truck 7 hmanga phurh an ni a, truck 3 chu hnamdang ta leh Truck 4 dang chu Mizo ta a niin an report a. Dan lova kuhva hmanga sumdawn leh phurh khapna thupek a chhuah atanga thla khat hnu leh Chief Minister hova dan lova khawchhak atanga Dan lova sumdawnna kal mek tihtawp dan tur official ten an rel hnu lawk, Dec. ni 14 zan atang khan Champhai atangin Kuhva rah ro chu hmun danga kalpui turin kawngpui pangngaiah phurh a ni. Ni dangah chuan sumdawngte hian kuhva rah ro hi kawngpui pangngaiah kal tir lovin an hel thin a. Thawhlehni atang khan kawngpui pangngaiah kalin ni khatah Truck Trip 25 zel kalin December ni 16 atangin Truck trip 30 kal tir thin a ni ta a ni.
Inrinni zan a kuhva phurte chhiah pekna lehkha (Tax invoice) atanga a lan dan chuan heng truck te hian Kuhva bag 180 an phur a, kuhva rate hi Kg. khat Rs. 20 angin an sawi a, open market ah hian Vairengteah kg.1 Rs. 295 vel a niin bungraw hlut zawng Rs Nuai 42 vel nia ngaih a nih laiin Tax invoice ah chuan Rs Nuai 3 vel man chauh angin tarlan a ni a, Mizoram a chhiah lut tur awm chu Rs 7,200 chauh a ni ta a ni.
Kuhva rah ro Champhaia phurh luh leh Champhai atanga phurh chhuah hi Customs Preventive Force leh Assam Rifles ten an vil ber a, Kuhva rah phur lirtheite’n Champhai Police check Gate an paltlang chungchangah an thuneihna piah lam a nih thu leh kawngpui pangngaia kal chungchangah hian Champhai Police ten inhnamhnawihna an nei lo ni a sawi a ni.
Comments are closed.