DC SAWN DUH LOH LANTIRNAN SAWRKAR LEHKHA COPY HAL

Get real time updates directly on you device, subscribe now.

Nimin piah a Mizoram sorkarin officer lian a siksawi zingah Champhai DC Pi Maria CT Zuali sawnchhuah anih chungchanga nimin khan Champhai a Tlawmngai Pawl hrang hrang thukhawm chuan Champhai DC sawnna thupek chu sut leh turin Mizoram sorkar an phut a, DC sawnna order lehkha copy an hal.
Tunhnaia Myanmar atanga dan lova kuhva tawlhruk langsar taka dotu Pi Maria CT Zuali sawn tura Champhai a lirthei neitu pawl hrang hrang inzawmkhawm parukin Chief Minister hnena ngenna an thehluh tur lehkha a tlangthan tak hnu lawka Mizoram sorkarin officer lian a siksawi zinga telve Pi Maria CT Zuali chu Addl. Secretary, FCS&CA, Planning & Programme Implementation-ah sawn a ni a. Sawn anih chungchanga nimin khan Champhai a NGO Co-ordination Committee huaihawtin Champhai a Tlawmngai Pawl hrang hrang pakua Sub-Hqrs. YMA Conference Hall a thukhawm chuan Central Sorkar leh Home Department thu bawhzui a huaisen taka hma latu Champhai Bawrhsap Pi Maria CT Zuali sorkarin a sawn chu hriatthiam har an tih thu an sawi a, a rang thei ang bera transfer order sut leh turin Mizoram sawrkar an phut a, January ni 18 hmaa sut a nih loh chuan hmalak zel dan tur an ruahman anga an kalpui tur thu an sawi.
Tlawmngai Pawl hrang hrang thukawm chuan Dan leh thupek dik taka kengkawh a, dik taka roreltu Champhai Bawrhsap Maria CT Zuali,
Champhaiin a mamawh lai taka Champhai a chhuahsan chu rem an tih loh thu sawiin, Champhai mai ni lo, Mizorama dikna leh rinawmna tundin a nih leh theihna turin hmalak zel an tum tih an sawi bawk.
Thukawmin a rel angin Meeting zawh hian Champhai DC sawnchhuahna order chu an pawm lo tih lantir nan a copy an hal nghal a ni.
Champhai NGO Coordination Committee Chairman Lalnunmawia chuan zawhna chhangin, Nikum December ni 18 zana Kelkang daia Champhai DC-in Kuhva a man chungchanga a laka thubuai ziah luh a nih vanga NGO CC-in DC sawn lo tura Mizoram Sawrkar an ngen hnu a, DC sawnchhuah a ni chu a phenah thil inphumru a awm ngei nia rinna a lian hle tih a sawi.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More