Champhai District chhungah Covid-19 kai mi 34 hmuhchhuah belh leh a ni. Nimin khan Rapid Antigen Test hmangin hri kai Tlangsam-ah mi 8; Vaphai-ah mi 5; Vengthlang-ah mi 4; New Champhai-ah mi 3; Vengsang, Dinthar, Dungtlang, Bungzung leh Farkawn-ah te mi 2 theuh; Vengthlang North, Zotlang, Electric Veng leh Sesih-ah te mi 1 theuh hmuhchhuah an ni a.
Heti hian Champhai District chhunga hri kai hmuhchhuah chu mi 4633 an tling tawh a, mi 3960 te enkawl dam tawh niin enkawl lai mi 668 anla awm mek a ni.
Pu Vanlalhruaia, Champhai Kahrawt Veng chu Covid-19 avangin a thi a, Champhai DCHC-a Covid-19 avanga thi hmasa ber a ni.
Pu Vanlalhruaia (70) hi October ni 15 khan hri a kai tih hmuhchhuah niin natna dang nei tel anih avangin DCHC-ah enkawl nghal niin a nunna chhan tuma theihtawp chhuah anih laiin nizan hmasa dar 10 khan a thi a. Pu Vanlalhruaia hi Dedicated Covid Health Centre, Champhai a Covid-19 avanga thi hmasa ber a ni. A ruang hi Murlen khuaah vui turin Champhai atangin phurh phei a ni. Pu Vanlalhruaia hi LM Middle School-a Chokidar hna chelh lai a ni.
Heti hian Champhai District case zingah Covid-19 avanga thi mi 7 an awm ta a, Champhai District mi leh sa hmun danga thi mi 5 nen Covid-19 avanga thi mi 12 an awm tling ta a ni.
Comments are closed.