DIET CHAMPHAI-A ZIRLAITE CHHUANAWM

Get real time updates directly on you device, subscribe now.

District Institute for Education and Training (DIET) Champhai chuan nimin chawhma dar 11 khan Diploma in Elementary Education (D.El.Ed) 2021 examination-a zirlai tithate lawmpuina hun DIET Multipurpose Hall-ah an hmang a. He hun hi District Bawrhsap Pu James Lalrinchhana chuan khuallian niin a hmanpui a ni.
Khuallian Pu James Lalrinchhana chuan zirlai hlawhtlinna changte chu thinlung taka a lawmpui thu sawiin, an dai chinah duh tawk mai lova hmabak eng tak an neihte tha taka hlenchhuak zel tura theihtawp chhuah chhunzawm turin a fuih a. Eng hna pawh an thawhnaah Pathian tih chunga thawk fo turin a chah a. Zirnain thil a tih theih zia leh khawvel thlak danglam dawrh theitu a nih thu tarlangin, hlawhtlinna chang turin zirtirtu, zirlai leh chhungte an pawimawh vek a ni, a ti a. Zirlai nih chuan tumruhna leh taimakna neih a pawimawh thu a sawi bawk.
He hun hi DIET Principal Pi Hnamte Rebecca Lalbiakdiki chuan a kaihruai a. Khuallian Pu James Lalrinchhana’n rank holder-te hnenah lawmpuina thilpek a hlan a ni.
MBSE in D.El.Ed Examination 2021 result a tih chhuahah DIET Champhai atang hian 2019-2021 batch zirlai 47 pass chhuakin an zinga mi 13 hi Distinction-ah an pass a, abak mi 34 te hi 1st division-ah an pass a, Mizoram puma top 10-ah zirlai 4, Zothanpuii (1st position), Lalawmpuii (2nd position), Lalrinchhungi (3rd position) leh RK Lalnunpuii (8th position) te an lang a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More