Gauhati High Court Judge, Justice Michael Zothankhuma chuan nimin khan Champhai District Court, Zote-a hnathawh dan a enfiah a. District Court hmunhma thar tura ruahman chhin pahnih, Zote leh Vengsang a mite chu khawtlang hruaitute leh official-te nen an enfiah bawk.
Mizoram State Legal Services Authority (MSLSA) leh Champhai District Legal Services Authority (DLSA) tangkawp buatsaih, ND&PS Act chungchang zirhona I&PR Auditorium, Champhaia neih chu nimin chawhnu khan Justice Michael Zothankhuma, Executive Chairman, Mizoram State Legal Services Authority leh Champhai District Portfolio Judge ni bawk chuan khuallian niin a hmanpui bawk.
Khuallian Justice Michael Zothankhma chuan, ruihhlo leh a kaihnawih chuan khawvel pumah nghet taka bu an khuar tawh a, India ram pawh ruihhlo hluarna ram ten a hual vel avangin a lo luh nasat thin thu leh, ruihhlo in nasa taka nghawng a neih mek thu a sawi a. Ruihhlo tawlh leh zuar man thinte dan hnuaia hrem an nih ngei theihna tura tanlak zual a ngai hle a. Heng mite hi man an nih atanga chargesheet siam thlengin tihsual neilo tura fimkhur a ngai a tih sawiin, hrem an nih ngei theihna turin information dawn atanga a tawp thenga buaipui tul leh hmalak dan turte a sawifiah a ni. Ruihhlo tawlh venga tlawmngaia thawk chhuak thin YMA te pawh, dan anga ruihhlo khawihte hrem an nih theihna tura thuhretu tha tak nih tum tura chahin, excise leh police te tha taka tawiawm a tul a ni, a ti a. Dan chu India ram puma zawm tura duan a nih thu leh, dan zawm thlap chu a kalkawng thui deuha hriat vanga pumpelh zawnga kalpui tum thin leh, dan pumpelh zawnga kal tum chu a pawi thei tih a sawi bawk.
Champhai Bawrhsap Maria CT Zuali chuan, Ruihhlo leh a kaihhnawih avangin District Jail Champhaiah tang eng emawzah an awm thu leh, ruihhlo ngai tam tak an awm thu sawiin, ruihhlo hi natna inkaichhawn theih nen a inkawp tlat avangin ngaimawh a tul tak zet tih a sawi a.
Lalrinpuia Varte, SP Champhai chuan Champhai DEF hnuaia Police Station 3 kaltlanga case ziahluh za zela 30 chu ND&PS thubuai a nih thu a sawi bawk.
He hun hi R.Vanlalena, Member Secretary, MSLSA chuan a kaihruai a. Peter Zohmingthanga, Asst. Commissioner, Excise & Narcotics Department chuan ruihhlo man leh chhui chian kawnga hriat tur tulte a zirtir a.
B.Zoliana, Deputy Commissioner, Excise & Narcotics Department pawhin thu a sawi bawk a. Joel Joseph Denga, Registrar, Gauhati High Court; Lalbiakzama, Addl. District & Sessions Judge, Aizawl; Law & Judicial Officer, Police leh Excise thawktute bakah YMA hruaitute an tel a. Sylvie Z. Ralte, Addl. District & Sessions Judge chuan lawmthu sawiin hun a khar a ni.
Comments are closed.