DOCUMENT LEM SIAM TE CHHUI DAWN

Get real time updates directly on you device, subscribe now.

Champhai District Draft Electoral Rolls, thar ber chu Election Officer Lalnunfela Chawngthu chuan nimin chawhma khan DC Conference Hall-ah tlangzarhin, Political party aiawhte hnenah Draft E-Rolls, 2022 tlangzarh copy khat theuh sem chhuah a ni.
Election Officer Lalnunfela Chawngthu chuan, Vote nei thar tura dilna, paih, insawn leh tul dang siamthat ngaite chu November ni 15, 2021 thleng bialtu BLO leh Voter Helpline Application-ah te ngaihven tura chahin, November ni 16 atangin hearing kalpui tan tum a ni, a ti a. November ni 15 hnu lama dilna lut, mahni veng/khua a hearing nang hman lote chuan District Election Office-ah hearing an nei thei ang, a ti.
Champhai District chhunga Assembly Constituency 3-ah vote nei mi 54,117 (mipa 26,521 leh hmeichhia 27,656) an awm a; mipa vote nei aiin hmeichhe vote nei hi 1,135 in an tam zawk a ni.
Service voter 449 (mipa vek) an awm bawk a ni. Assembly Constituency zingah 24-Champhai South A/C ah vote nei 19,622 (mipa 9,435 leh hmeichhia 10,187) awmin an tam ber a. 23-Champhai North A/C in dawtin
vote nei 19,226 (mipa 9,365 leh hmeichhia 9,861) awmin an dawt a. 25-E.Tuipui A/C-ah vote nei 15,329 (mipa 7,721 leh hmeichhia 7,608) awmin vote nei awm tlem ber a ni.
Kumin January ni 20 a Final E/Rolls, 2021 tlangzarh (voter 54,227) nena khaikhinin nimina tlangzarh Draft E/Rolls, 2022 (voter 54,117) ah hian vote nei zat 50 (-0.9%) in a kiam a. Continuous updation kaltlanga dilna lut 55 pawm a ni a, awm nawn 9 leh insawn 83 te paih niin, paih zat hi a vaiin 92 a ni.
Electoral Roll ennawn kalpui mekah kum hmasa aia nasain Birth Certificate, Voter’s ID leh document dang diklo leh a lem siam thin chhuichhuah kawngah tanlak tum a a ni a. District Election Office, District Research Office leh Police ten document lem leh diklo zawnchhuah beihpui an thlak dawn a, dan bawhchhia man chhuah chu hrem an ni ang.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More