E. ROLL DIK LEH FELFAI SIAM TURIN KALKHAWMTE CHAH

Get real time updates directly on you device, subscribe now.

Nimin chawhma khan District Level Standing Committee (DLSC), Champhai District chu District Election Officer Maria CT Zuali, District Bawrhsap hovin DC Conference Hall-ah an thukhawm.
District Election Officer Maria CT Zuali chuan mipui rorelna atana pawimawh tak Electoral Rolls a inziahluh leh felfai taka vawnhim a pawimawh a, Electoral Rolls dik leh felfai tak siam a nih theihna turin kalkhawmte chu thawhpuiah a sawm a. Hun hlu tak senga thutkhawma tel zawng zawngte chungah lawmthu a sawi bawk.
He thutkhawmah hian chhan hrang hrang vanga Polling Station sawn leh Polling Station hming thlak ngaite tarlan niin, rawtna leh zirchianna District Level Standing Committee hnena thehluhte ngun taka sawiho a ni a. Champhai District chhung Assembly bial 3 atanga Polling Station Building sawn ngai panga (5), Polling Station Building hming thlak ngai rawtna siam pali (4) leh Polling Area tih dik ngai pahnih (2) te chu pawm a
ni a. Hei hi hi Election Commission of India (ECI) pawmpui tura thawn a ni ang.
Special Summary Revision of Photo Electoral Rolls, 2022 kalpui chhoh turah kum hmasa aia nasain Birth Certificate, Voter’s ID leh document dang diklo leh a lem siam thin chhuichhuah kawngah tanlak tum a ni tih tarlan a ni a. District Election Office, District Research Office leh Police tangkawpin document lem leh diklo zawnchhuah beihpui an thlak tel dawn a, dan bawhchhia man chhuah an awm a nih chuan an chungah dan anga hremna lekkawh zel a ni ang.
Ruahman dan chuan November ni 1, 2021 khian Draft Electoral Rolls tlangzarh a ni ang a. Ni 1-30.11.2021 chhungin dilna leh rawtna thlen hun hawn a ni ang a, hemi hun chhung hian remchan dan anga Special Campaign neih a ni bawk ang. December ni 20, 2021 atangin dilna leh rawtna thlente chinfel a ni ang a, database siamthat leh supplement chhutchhuahte tihfel a nih hnuah nakkum January thla chhung khian Electoral Rolls thar ber tlangzarh tum a ni ang.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More