EASTERN UNIVERSITY CAMPUS NEIH DAN TUR BUAIPUI ZEL

Get real time updates directly on you device, subscribe now.

Nimin khan Law & Judicial Minister TJ Lalnuntluanga chuan, Govt. Champhai Coltege hnuaia stream hrang hrang 4 atanga graduate thar mi 168 te hnenah graduation certificate a hlan a. Eastern University Campus leh zirna sang zawka mamawhte dah tur a tul angte buaipui mek zel a ni, a ti.
Govt. Champhai College Graduation Day 2021, College Multipurpose Hall-a
neihah hian khuallian niin, Minister TJ Lalnuntluanga chuan, College zirlaite chu chin tawk neia social media hmang thiam tura fuihin, thil tangkai tak ni mah se a hman dan kan thiam loh chuan hna dang thawh a tibahlah a, nakin zela ram economy thlenga nghawng thei a nih avangin hman dan kan thiam a tul hle a ni, a ti a. Thil nih dan dik leh thlen dan dikte zirchiang hmasa lo leh belchiang hmasa lova thu hre hmasa nih duh
vang ngawta social media a tawngkam mawi lo leh dik famkim lo thehdarh thin chu pawi a tih thu a sawia. Hei hian kan ram ralmuanna leh zalenna thlenga a tih chhiat theih avangin kan fimkhur a tul a. Zalenna kan duh ang hian midangte pawh hian an duh ve a ni tih hi kan hriat thar fo a tul a ni, a ti.
Law & Judicial Minister chuan, tunlaia kan rama thil pawimawh ber pakhat chu ngaihtuahna leh rilru sukthlek siam dik hi a ni a, a tha zawng leh a eng zawngin ngaihtuahna nei ila, chu chuan kan nunah beiseina nung min siam dawn a ni, a ti a. Mimal nun leh chhungkuaa harsatna tawhte chu hmasawn leh chhel nana hman tangkai thiam a ngai tih. sawiin, vuivaina nei tam mi aiin midangte tanpui tam hi khawvela mihlim leh mi awhawm berte an ni, a ti bawk.
Intlansiakna khawvelah dam khaw chhuak turin theihtawp chhuah a tul a, a chak, chhel leh dawh thei apiang dinchhuahna a nih avangin zirlaite chu theihtawp chhuah turin a fuih a. Hnathawh hreh lo tur leh eng hna pawh tui tak, rin tla, thuawih, dawhthei, chhel leh huaisen taka thawk a, beidawng mai lo turin a chah a. Mimal, hnam leh ram din khawchhuah theih nan theihtawp chhuah tura sawmin, an hma lam hun kal zel turah Zoram leh hnam tana thawk turin duhsakna a hlan a ni.
P. Lalhmingliana, Principal, Govt. Champhai College chuan graduate tharte chu rintlak leh hawihhawm tak chunga khawtlang, Kohhran leh NGO tana chhawrtlak ni tura tang deuh deuh turin a fuih a. Rinawm taka ram leh hnam tana theihtawp chhuah turin a fuih bawk.
Govt. Champhai College atanga Mizoram puma rank holder pahnih Khamkhanthawnga, Department of Political Science-a 6-na leh Lalzawmliana Khiangte, Department of Economics-a 7-na hnenah khuallian hian chawimawina thuziak a hlan a. College-in Department hrang hrang atanga titha a thlante hnenah chawimawina thuziak sem chhuah a ni bawk a.
Chawhma lamah Khuallian, L.Khuma Varte, Vice Principal hovin Freshers’ Social leh College Magazine tlangzarhna hun an hmang bawk.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More