Champhai Electric Veng Branch YMA chuan ruihhlo do beihpui thlakna kal zelah, nizan hmasa khan an huam chhunga kum 10-16 inkar naupangte ko khawmin inzirtirna hun an hmang.
Ruihhlo do beihpui thlak hun an hman hi SYMA President F.Lalrinmuana leh Addl SP C.Lalengliana te’n an telpui a. C.Lalchhuanliana, Vice President Electric Veng YMA branch chuan he hun hi kaihruaiin, R.Zodingliana, Presisent Electric Veng YMA hnen atangin fuihna thuchah ngaihthlak a ni bawk.
Zirtirna petu C.Lalengliana, Addl SP Champhai chuan Mizo hnam a dinchhuah theihna turin Mipa te tan a ngai tih sawiin, Mizoram Electoral Roll-ah mipa aiin hmeichhia sing hnih chuangin an tam zawk a.
Kohhran lian pahnih thalai zingah kum khat chhung mitthi zat report-ah mipa thi an tam zawk bawk a. Kum 1984 atanga vawiin thlengin ruihhlo vanga thi mipa an tam zawk a ni, a ti a. Champhai hi ruihhlo tawlh luhna, Golden Triangle hnaia awm kan nih avangin ruihhlo lakah thalaite inthiarfihlim a tul a. Kum 2022 chhungin Champhai Police in Ruihhlo Cheng Nuai 2000 chuang hu an man tawh tih a sawi bawk.
Damdawi hi tangkai taka hman tura siam chhuah ni mah se, hman sual chuan thil pawi tak a thleng thei a ni, a ti a. Eng emaw hun hman dawna rui chunga nuam zawk emaw kan tih hi, rui lo hai lovin a nuam zawk a ni, a ti bawk.
Addl SP hian thlalak hmangin naupangte hi Ruihhlo nghawng tha lo hrang hrangte leh ruihhlo kaihhnawiha hremna dan hrang hrangte a hrilhfiah bawk.
Comments are closed.