EMMANUEL AFTER
CARE CENTRE Bethel Veng,Champhai
Mizoram : 796321
Phone: 9612194537
Home Crusade emaw Tawngtai leh Individual Counselling mamawhte tan koh/pan theih reng kan ni e.
Cont; 9612194537
MEIPUI-AH LALPA
C. Hranghluna
‘Ani chuan, “Ngai teh u, mi pali phelha mei laia vei vei a, na hauh lovin ka hmu a, a palina landan phei chu pathiante fapa ang a ni,’’ a ti a.’
– Daniela 3:26
Nia, Lalpa min chinralna hmunah chauh lo chuan Lalpa hi a ropui thei tlat lo nia ma le. A mak lutuk…Evangelist niin thu i sawi thin a ni mai thei e, Kohhran upa niin Kohhranah ro i rel thin a ni mai thei. Pastor hial pawh i ni thei a, i dinhmun chu engpawhnise, ‘Chinralna’ tello chuan i nunah Lalpa a ropui thei tak tak miah lo vang. Midangte chuan i thiltihte a vang chuan Lalpa chu i nei tih an hre thei anga, i Lalpa chu tunge a nih chiah erawh chu chinral i nihna hmunah chauh an hrefiah thei thung ang.
Kan inkhawm thin a, kan tawngtai thin a, Pathian thu kan sawi thin a, lamtualah kan lam a, mahse; kan Lalpa chu engang chiah nge a nih midangin an hriattheihna tur chuan Lalpa chinralna hmunah chauh chuan a ni midangten kan nuna Pathian an hmuh theih ni!! Kan inkhawma, kan tawngtaia, lam tuala kan lam hian Kristian kan ni tih chu tupawhin an hre thei a, mahse, kan Lalpa chu eng ang chiah nge tih chu chinralna hmunah chuan a lang fiah ber tlat a nih chu!!
Khai mah aw…Daniela chu nitin vawi thum ngawt Jerusalem lam hawiin a tawngtai thin a. Mi dik leh rinawm tak, fing tak a nihnate kha mite zawngin an hre nameuh mai. Mahse, Daniela Pathian miten an ngaihsanna leh ropui an tihna te, a thiltihtheihzia an hriatna te, a chakzia an hriatna te chu Sakeibaknei pukah khan a ni tlat. Sakeibaknei pukah khan Daniela chu a tawngtai tih kan hre hauh lo, diktak chuan a chakna leh theihna lam chhutin, Samsona anga chak pawh a ni hek lo.
Mahse, Sakeibaknei pukah chuan Lalpa Vantirhkoh lokalin, Sakeibaknei kha te chu ti chipin, Daniela Pathian chuan a thiltihtheihzia a tarlang ta a. Chutah meuh chuan Lal Daria leh a ram then za leh sawmhnihah chuan Daniela Pathian chu biak tur a ni tih an puang chhuak ta chuai chuai a nih kha!! Lalpa chuan harsatna hmanga kan chakna leh theihna in a chinfel theih miah loh hmunah min hruai lut a, chutah ngei chuan Pathian chak a nihzia a tarlang ta thin a ni. Lalpa chu fakin awm rawh se. I harsatna hmunah chuan i beidawng hle tawh em? I harsatna chu nangman i chingfel thei miah lo em? Ngai thla teh, Lalpa chuan a thiltihtheihzia lantir turin a che mek a ni. Nangmah ti chhe thei Sakeibaknei ang maia hlauh awm emaw phiarrutu, nangmah do a harsatna siamtu che chu hnehsak tur chein Lalpa chu a che ngei ngei dawn si a!
Diktak chuan ringtu unau tam takte hi chuan thil tha tih nachang bak kan hre meuh lo va. Chinralna tel hauhlo pawh hian thil tha hi kan ti chiam thei a, mahse, chutiang chauh chu kan ringtu nunin a tawn chin a nih chuan, harsatna tak tak hmanga chinral kan nih chiah hian, Lalpa hnaih a, a mah auh tam a hnekin, Lalpa demna thinlung nen Lalpa chu kan tlanbo san daih thei hial a ni. Sadraka te, Mesaka te, A bednego te chanchin kan en chuan, lal inchhungah insum chikima insumin, ei leh in thu hlaah pawh fimkhur takin Lalpa an tihna avangin an khawsa a nih kha. Mahse, Nebukadnezara leh a mipuite khan Sadraka te thian ho Pathian kha hre teh meuh mahse, an hriatfiahna tak tak zawk chu meipuiah a palina tura Lalpa a rawn tel ve khan a ni tlat. Meipuia Sadrakate thian thum rawn pali tu an han hmuh meuh chuan Nebukadnezzara leh a mipuite khan Lalpa chu lei leh van lalber a ni tih an awih thei ta a nih kha.
Thil tha kan tih lam a hi kan sawisel hauh lo va, ringtute u thil tha tih i ning suh ang u. tawngtai te, inkhawm te, midang tanpui te i uar nasa deuh deuh ang chu. Chutihrual erawh chuan harsatna ruamah Lalpan min chingral mek a, hrehawmna leh thimna inmin bawm a nih pawhin, kan mihring chakna leh theihna hmanga in tipaukhauh a, mahni in hrosa mai lovin, Lalpa hnathawh lo thleng tur chu i beisei tlat zawk i la. Ringtu kan nih lanna awm taka ringtu kan nih kan tarlan ngai reng reng loh avang hian khawvel mi te hian min awt hauh lo va, kan Pathian hi a ropui a, thil a tithei a ni tih pawh an hre thei hek lo.
Mosia pawh Lalpan engkim a tihsak a, Mosia hmanga Lalpa thiltihtheihna lo lang kha Pharoa chuan in tihluhlul nan leh in tihpaukhauh nan a hmang tlat a. Lalpa ropui zia a hmuh avang khan hnehin awm mahse, a thlarau lam thuah chuan Pharoa kha a hlawk hauh lo tih kan hre thei a ni. Mosia hmanga Lalpan mihring tihtheih hauhloh a han tih khan Lalpa chu Lalpa a lo ni ngei a ni tih khawvelin a hre ta chauh a nih kha. In chhungkuaah chuan Lalpan Lal ropui tak a nihna puan chhuah a duhtakzet a ni. Lalpa ropuina chu in hmuh a, a thiltihtheihzia in tem theih nan eng harsatna nge Lalpa chuan a pek ve che u le? Amen
……………………………………………..
‘Mihringhlui thihna’
Vawi khat chu Pastor pakhat hian a Kohhran-ho te chu Good Friday ni chuan inkhawmna a neihpui a. A Kohhran mipuite hnenah chuan biak in chhungah puan dum sin vek turin a ti a. Mitthi kan vui dawn a ni a tih avangin thuawih tak in a Kohhran hote chuan puan dum an raawn sin vek a. Tichuan Pastor chuan inkhawm chu kaihruaiin uluk taka vuina thuchan a sawi hnu chuan, biak in lam tuala kuang an dah chu a hawng a, a chhunga mi chu an vui tur a nih avangin a Kohhran mipuite chu en den den turin a ti a. Tichuan mipuite chu a mal te te in kuang chhung chu an en zel a. Kuang chhungah chuan Pastor chuan darthlalang a lo dah lawk avangin an mahni hmel chu an va hmu ta zel a. Chutia an vaia an en zawh vek hnu chuan kuang chu thlanmual lamah an kalpui ta a.
Isua thihna hi kan thihna a ni tih i hre thar leh ang u. A maherawh chu kan thih dar hi keimahnin kan vuak kher a ngai lo va, kan thi a ni tih hi midangten an hriat phawt chuan kan thih dar hi an vaw thin a ni.
Pathian thu-ah hian in saawi thih lam a ni hran lo va, Kristaa kan thihna chu kan nunah a lolang chhuak tur a ni zawk a. Khawvelah awm mah ila, Krista thihna tawmpui tu te chuan khawvel mite anga an awm a rem tawh lo va. Khawvel chu an thihsan ngei a, tholeh Krista nun thar chu an nunah tarlanin a awm thin ta zawk a ni.
Kan Lalpa thihna leh thawhlehna ni kan hman mekah hian khawvel thihsan a, Krista keimahnia nung zawk chu chhuangin, kan Lalpa chu keimahniah a nun i phal ang u khai. kross chuan kan mihring a vuiliam a ni si a.
…………………………………………….
Christian Lehkhabu Tha ber Thlang Dawn
Media hmanga Pathian rawngbawl tura din, ‘Christian media Society’ chuan Kristian lehkhabu chawisanna chikhat atan kum khat chhunga Mizo Kristian lehkhabu chhuak zinga a tha ber an thlang dawn, kumin hian nikum 2008 chhunga Kristian lehkhabu tha ber thlan tumin hma an la mek a, he lehkhabu tha ber thlanna turah hian hetiang hian a thlangtu tur committee din a ni. Chairman: Vanhela Pachuau. Vice Chairman: Upa Dr. PC. Biaksiama. Secretary; C.Lalnuntlinga. Members; 1) Rev. Vanlalzuata 2) Upa Dr.H.Lallungmuana 3) Dr.Nunthara 4) Pu Lalrammawia Ngente 5) Pu PC.Lianhmingthanga. Heng bakah hian Christian media Society hruaitute an tel bawk ang.
Endikna tehfung turte; 1) Bible zirna nen a inmil em? 2) Tunlai ringtute tan a pawimawhna 3) Layout, design & General Impression 4) Punctuation & Grammer 5) Creativity & Originality. Award hming leh lawmman; Kristian lehkhabu tha bera thlan chhuah chu KRISTIAN MEDIA SOCIETY (BOOK AWARD) tih a ni anga, lawmman atan Rs.5000/- leh thuziak (Citation) pek a ni ang. A huam chin; Mizo irawm chhuak ngei a ni tur a ni a, lehlin (translation) a huam lovang. Tin, Revised / Large pawh a huam lovanga, kohhran bil lehkhabu pawh a huam lovang. Chutih rualin bible hrilhfiahna erawh pawm a ni thung. Tin, tun tuma lehkhabu tha thlan tur hi kum 2008 chhunga lehkhabu chhuak a ni tur a ni a, lehkhabu chu phek 100 aia tlemlo a ni ngei tur a ni. Lehkhabu hi kumtin thlan tum a ni. Pekna tur leh hmun; Kum 2008 chhunga kristian lehkhabu tichhuakte chuan lehkhabu endik tur hian a copy min pe thei ula kan lawm hle ang. Lehkhabu pe theite tana pekna hmun turte. 1) Christian Outlook Office (Dawrpui, Near Assamrifle church ) 2) OM Books , Chandmari, Aizawl. Lehkhabu pek tur neite chuan April 30,2009 thleng pek theih a ni ang. A chunga kan tarlanin a huam chin lehkhabu ziaktute chuan endik tura min pek theih chuan kan lawm hle ang. Sponsor duhtan; Christian Media Society chuan kan ram Kristaian lehkhabute chawisana a awm theihnan leh Lal Isua ram zau nan hetianga ruahmanna siam hi a ni a. chuvangin rawngbawlna a ngaia sponsor thei kan awm chuan a lawmawm hle ang. Christian Media society hian lehkhabu 4 a tichhuak tawh a, nikum atang khan Kohhran tih bik neilo chanchinbu, Christian Outlook chu thlatin a lo ti chhuak tawh a, tin, tunlai thil thleng mila mithiam hrang hrangin, ‘Talk Show’ an neih chu an lo tichhuak tawh bawk a. Media hmanga pathian ram zauh hna thawk zel turin hma an la mek bawk a ni.
……………………………………………
Joint KTP ten tlawh ang
Champhai Jt.KTP Office Bearer Meeting Vawi-2 na, Ni 20.3.09 a neih zawh taka a lo rel angin, kum 2009 chhung hian Champhai khawpui chhunga Branch hrang hrang tlawh turin hetiang hian ruahmanna an siam. 1. Zote Branch 2. Mualveng branch 3. Zion Veng branch 4. Hmunhmeltha Branch 5. Dinthar Branch. Branch dang tlawh programme erawh a hranpaa la ngaihtuah leh tur a ni ang.
……………………………………………
UNODC I 81 kalpui mek
Tunlai hian ISVSA DIC a thawktute chuan, UNODC hnuaia Project I-81 an kalpui mek chu rimtakin an kalpui mek a. February thla chhung khan Tuipui, Khawzawl leh Hmunhmeltha an tlawh a, April thla hian Hnahlan, Khuangphah, Vaikhawtlang, N.Diltlang, Vapar, Murlente tlawhin, Tualcheng leh Lungphunlian khua te pawh tunkar hian an tlawh mek a, tin, Ngaizawl leh Neihdawn te tlawh tum a la ni bawk. Heng an kalna khuaa khawtlang hruaitute hian an lo tawiawm tha hle a, an kalna khuate nen hian HIV/AIDS leh ruihhlo chungchanga thawhhona tha nei tura inbuatsaihna an buaipui ber a ni.
……………………………………………
Passenger Dangdai;
Texas police pahnihte tan chuan motor tlan chak lutuk um zui chu an nitin hna a ni a; mahse, passenger seat a alligator (Awle te chi ti mai teh ang ) lo bawk run mai chu nitina tawn zen zen tur a awm tlat lo.
Texas police Steve Stanfield leh a partner chuan car pakhat tlan chak lutuk chu umzuiin an tiding a, motor kawngkhar hnunglam an han hawn nak chuan alligator meter 2 zeta sei a lo bawk run mai chu niin. An phunasa hlawm teh a sin!!
Motor khalhtu chuan chu alligator chu Houston khawpuia kawngsir pakhata a chhar, niin a sawi a, ‘ka thianpa tuikhuaha chhuah leh turin ka man ta a ni,’ a ti.
Steve chuan, ‘Beisei loh lutuk passenger seat-a alligator feet 6 aia sei mah a lo bawk run mai chuan min tiphu nasa teh e. Motor hnung lamah khan a duh duhin a lo tal kual vel a ni awm e,’ a ti.
Police te chuan ransa humhalh lama thawktute punin he alligator hi wildlife perk-ah chhuah zalen a ni leh ta a ni.
Car hi an han dap leh deuh a, ruk ruk thhil eng eng emaw an man chhuak a. Motor khalhtu hi ruk ruk leh phalna nei lova alligator lo kawl ve ringawt thubuai siam sak a ni.
……………………………………………
SLUM – 4 – AREA
Khawpui lunlai taka No-4 zawrhna hmanga Sumdaawng Milian-er…? an awm tlat hi Slum-4-Area tiin kan rawn kaihlek kual vel a. A sakhmingah zawng i buai lo phawt teh ang aw, ka unau! – Ed.
Helai hmun hi i hria em? Champhai khawpuiah chuan a lun lai tak a nia. Tuipui Bazar tia kan sawi mai thin kha a ni a, tunah chuan DK Traffic point ti pawn sawi ila, kan sawi sual tampui awm love. Helai hmunah hian zalen takin No – 4 an zuar thin a, chutianga zuartute chu ‘Standing’ an ti mai thin. A chhan chu an No-4 zuartu thenkhatte hian mahni In a zuar kher lovin, khawlaiah an vahpui a, ding chunga an zawrh vang mai a nia. Hetiang taka khawlaia damdawi zawrh ching hi Champhai hian kan la hmelhriat nasa lutuk lo va, tunhnai atangin erawh hetianga khawlaia Damdawi zawrh hi a hluar viau niin an sawi. Tin, hetianga No-4 zuarte hi an zalen hle niin an sawi bawk.
Electric Veng mawng ‘Sap-Sakei-lamlian’ an tih bawk, Kanan Veng nena an in rina lai vel-ah hian No-4 zuar hi engemawzat an awm thin a, tun dinhmunah chuan hmun hnih velah awmin, heng mite hian Standinga zuarte hnenah hian a hlawmin an pe mai thin a ni awm e. Kan thudawnnain a sawi zel danin tuipui bazar bul lawkah hian No-4 zuar hlun tak pakhat an awm a, Vengthlang huam chhungah hian No-4 zuar hlun tak chhungkaw pakhat an awm bawk. Hengmite hian an damdawi zawrhna a rei tawh avangin an ‘neh-nawh’ tawh hle a, hi minazawng an pe phal lova, an fimkhur ve hle, an rin zawng (addict nazaawng nilo)deuh Regular Customer an nei deuh zel tawh a ni awm e. Hetiat kan khawlai lunlai leh khaw hmellanna hmunlangsar tak, kan khualchhawn khawlaia No-4 a zalen lutuk hi chuan Champhai hmel a ti mawk zo tak ngial dawn e. A thalo a ni satliah law, a zahthlak tel tlat. Hei hi chu kan khawtlang hruaitute leh kan police lam pawh hian ngai pawimawh lehzual thei se a duhawm ngawt mai. A Sumdawngtute hian Milian nih tumin hlawk phah pawh nise, a Slumdog tlats!!
Tin, Champhaiah hian No-4 ti thar hi engemawzat awma hriat a ni a, a bikin hmeichhe tleirawl, High School kal zingah No-4 ti thar an awm nual a, anni ho hi chu an inthup thei hle thung an ti.
Hetianga khawpui lunlai taka No-4 zuar an awm te, hmuh awlsam taka zawrh a nih thin a vang hian thalaite tan thlemna thang a hnaivai hle a ni. Awlsam taka hmuh tur a awm miau chuan a ti thin emaw tih chhin chak tan chuan ruih leh mai thin a ti awl ngawt ang le.
Tunah hian vawikhat ruih hi Rs.100/- a ni tlangpui a, chung chu peace khat an ti a, peace khat hi beng ek kherna thir hmawr khat vel a ni awm e.
Tuna a lem kan rawn tarlan hi Insulin chhin a ni a. Hetiang Insulin hmanga injection-na hi No-4 ti thangte chuan an hmang nasa hle. A chhan chu a hriau hmawr a tet avangin thisenzam te deuhah pawh awlsam taka a vih luh zung zung theih a. Tin, a injection (inchiuna) hmuamhma a langsar lo va, ah bo mai a awl bawk avangin ngainat a hlawh hle a ni.
Tin, insullin chhin hi ‘Chhin Sen’ an ti a. Hetiang chhin sen khat No-4 hi tunlai hian Rs.700/- man vel a ni. No-4 ti thinte hi an dose a inanglo hle a, a tlangpuiin chhin sen khat hi vawi ruk (6) in vih (jection) nan an hmang tlang pui. A dose sang deuhte erawh chuan vawi hnih/khat lekah an hmang zo mai thin thung.
Tin, hun engemaw chen atang khan No-4 hian Zokhawthar ngawt khu kalkawng atan a hmang lo va. Tin, Zokhawthar a No-4 tam tak khu a tak vak lo a awm nual avangin, Khawzim, Bukphir, Darkhai leh Saikhumphai (Vaphai bul) atangtein No-4 hi a lo lut thin a. Champhai khawpui atanga No-4 zuartu te hian Zokhawthar aimahin heng khawdang a mite hi an chaw lut thin niin kan thudawnna chuan a sawi bawk.
Golden Triangle hnaivai a awm Mizote tan No-4 hi kan hmelma kumhlun a ni dawn a. Bagha lam atanga Spasmo Proxyvon lokal thin erawh khu chuan hun engemaw chen atang khan Champhai a rawn thleng ta meuh lo va. No-4 erawh a zual zawpui Vaihlenhlo tih ang chauhin, phung velh an sawi ang chauh a pung leh rem hlei thei lo a ni thung. A hranpa taka Survey awm chiahlo mahse, High School zirlai, mipa leh hmeichhia thlengin No-4 tih ching thar hi an awm ve zel niin sawi a awm bawk. Tin, heng No-4 Burma atanga rawn tawlh / zuar thinte hi hriatthiam an har em em a, nu tawp ve tak, kum lamah pawh puitling tak tawh te thlengin No-4 zuar a, tawlh ru thinte hi an ni nawk niin helama thawktu pakhat chuan a sawi.
YMA in ruihhlo do a puan takloh atang phei chuan No-4 hi hluar hle tura ngaih a ni a. Police Department lam pawh hian a khat tawkin No-4 hi an man deuh reng bawk a ni. Damdawi dang zawng zawng aiin No-4 hi a ngaih a na a, a hmuh a awlai bawk a, a enkawl pawh a khirh hle a ni. Tin, an rui lutuk a nihloh chuan a rui thinte hawiher hi minazawng tan hriatthiam a har hle bawk.
No-4 hi kan theih ang tawkin do ila, kan thunun thei ang a, mahse, a rem chuang lovang. Chu chuan No-4 do a tul nasatzia a tilang chiang takzet; hetihrual hian erawh a hnehna tak tak chu Krista a ni tih kan hriatthar a ngai telh telh ang. Kristaah lo chuan himna tak tak a awm lo ve. Nu leh pa ten kan fate himna tura theihtawk chhuahin Pathianah tawngtaina nen kan tlanluh a tul ta takzet a ni.
…………………………………………………….
Editorial
Tunlai chu Kristiante hunpui ropui tak takin min nang mawlh mawlh mai. Presbyterian Kohhran chuan Inrinni kalta April 4 kha kum 1906, April 4 a Zoram a harhna a lo thlen hmasak berna Ni a ni tiin Kohhran Nipawimawh atan SEC chuan a puang a. Nia, khatih hunlai harhna lo thleng ropui tak hriatrengna Ni kan serh hi a ropui narawh e. Kan hman chhan lam hian kan nun min hneh chiah em? tih zawhna erawh inzawt nawn ila.
Pathianni kalta khan Sunday Sikul naupangten khawlaiah ‘Tumkau Ni’ Isua ropui taka Jerusalem a luh Ni an hmang bawk a, tunkar Zirtawp khan kan Lalpa Thih Ni ‘Good Friday’ kan hmang zo hlawt a, vawi in Pathianni hi kan Lalpa Thawhleh Ni ‘Easter Sun-day’ a ni bawk a. A hming zawng a ropui namen e.
Heti hian duhthu i sam chhin teh ang hmiang ‘Harhna Ni’ hian kan rin-gtu nun khawvelin ‘Khawi-mu chawi’ taka a chawi mut mekna ata hi min ti harh thar leh se la. ‘Tum-kau Ni’ hian kan thinlung Kaisar lalna-ah hian ‘Hosana’ tia auin chung-nungbera khi Lelber atan min ‘welcome’ tir leh sela.
‘Isua Thih Ni’ hian kan tan Lalpa min thih sakna ngaihtuaha ‘Thih-sak ngam khawpa Lalpa tana kan inhlan ralna Ni’ atan i hmang ang u lah. ‘Isua Thawhlehna Ni’ hian Anuraka of Kasauti ‘thawh-lehna’ anglo deuh in!! Keimahni kan thiha: tho leh Krista zawk kan nun a a nunna Ni atan i hmang ang u khai! Tin, ngaiteh, Lalpa ngaih dan hi a sin ngaih tuah ngai ni! ‘In thla thar-te leh in hunbi nei kut te chu ka rilru chuan a hua a ni: ka tan thil hnawksak tak a ni: tuar ka ning tawh e’ – Isaia 1:14. Ngaihtuah chhun-zawm ve tawh teh lem….!!
……………………………………………………
SYNOD LEH ZU
– Zirmawia Ralte.
Thuhma; Sorkar thar apiangin a policy a tel ve lem lo Zu chungchangah ngaihdan a siam hmain Synod thukhawchang a ngaichang tel fo hi chu a inenfiah a ngai ngawtin ka hria, pawl (denomination) pakhat thu a ngaichanga a rawn dawn a nih chuan India Uniaon hnuaia Secular State hnuaia mi Hindu, Sikh, Mosolman etc. te pawh hriat tel a pawimawh viau ang.
Zu khap zel a ni; Zoram mipui za a za in Ruihhlo dona atan a ke pen YMA chu kan thlawp a, chu kan thlawpna chhan pawh proxyvon ten kan thalai nun min suat chak lutuk vang a ni. Damdawi hmansual (Drugs Abuse) do remna kawnga Zu a langsar ta lutuk a, a dotute fihlim hek suh, court a thuremtute fihlim hek suh, a man tu tur (Exicise Deptt) ber a sawrkar rawih lah an ‘kel e awl’ hlauh thung a, khap tura sorkar nawrtu ber Synod lah an member te rui leh pai an ‘uipui tuilian thlir a’
Tute kut ah emaw rulkua zen tum ang hrimin, a dotute chetsual palah leh lova tih luatah ‘Beramno hmulmettu hmaa a ngawi reng ang’ an ka ang tha duh mang si lova, pawl angin emaw Synod angin emaw kal fuhloh leh tihdikloh an nei ve thei a ni tih lam hawia thu rawn pe tu leh hrilhtute lah chu Ruihhlo ‘duh’ leh ‘tan’ tia ‘Ar chuk tui lo’ khawpa chhuah an ni zel si.
Hruaitu tha kan mamawh; Milem sakhaw bia leh Budhist sakhaw betu ten Pu Laldenga ‘THIL’ tih an hriatchian avanga an buaipui ve loh Pathian nung bia Kristiante zawkin Ralpui phiarin kan phiar a, kan buai zo ta a ni. Pute A.Thanglura, L.Keivom, HT.Sangliana, Laldengate kha chuan do tur diktak ‘THINLUNG’ hi an hrechiang a sin aw.
Engpawh nise, hnam naupanna kan kal pel zel a, kan biak Pathian duhdan kan chian hun hun a, hnawh chhuah policy emaw, in kalh sak emaw, tan-in khung hman a ngai tawh lo vang. Ram changkang hnam upate nungchang kan zir chho zel a, s tawk chauha Pathian rorel dan hi lungawi i zir ang u.
‘Where there is Demand, Supply is Automatically a rise,’ kan pu Multhus-a te pawhin an ti ta em ni kha!
……………………………………………………
Manner & Etiquette
Mi i biak in maw…nguntaka a chhanna che ngaithla turin inbuatsaih thin teh. Mithenkhat chuan mi han biak / zawhna han zawh zuk a, an chhanna ngaithla leh mang lova, thil dang sawi san leh emaw tihsan leh daih an ching thin a. I biaka tan chuan inngaih pawimawh lohna angin a lang thei daih a ni. Mi i bia a nih rau rau chuan i biak chhung na na na chu ngaiven ching teh. A hawihawm thlakin a mawi bik riau a nia.
……………………………………………………..
KEIMAHNI
Pu Zokhumate chhung Venglai hnen atangin Rs.200/- kan dawnga, kan lawm e.
Bazar nuhote hnen atangin chawhmeh kan dawng zel a, kan lawm e.
Tunkar chhung khan Home Crusade neih a ni.
Comments are closed.