FAINA ENDIK DAN TUR CHUNGCHANG REL

District Level Cleanliness Committee-in kumin Faina Hapta denchhena Champhai khawpui chhunga Veng hrang hrang, Zirna in, Sawrkar Pisa leh Hotel/Restaurant fai endik tura ruatte chuan nimin khan DUDO Pisa-ah Champhai DUDO K. Lalhmuakliana kaihhruaina hnuaiah Fai endik dan tur chungchang relin an thukhawm.

Champhai khawpui chhung VC area wise-a

Veng fai endik tur hian District SP Rex Zarzoliana Vanchhawng kaihhruaina hnuaiah YMA Sub-Headquarters ten an thawk dawn a. Zirna in hrang hrang faidan endik tur hian Champhai DEO C.Lalbiakzauva  kaihhruainahnuaiah MHIP Sub-Hqrs Champhai chu endik tura ruat an ni a.

Mizoram Sawrkar Department bik Pisa fai endik tur hian Addl. DC  Alexander V.Chongthu kaihhruaina hnuaiah MJA Champhai District ten an endik dawn bakah, Hotel leh Restaurant endik tur hian Champhai BDO Rebecca Laldinmawii Hrahsel kaihhruaina hnuaiah MJA Champhai District te hian an endik dawn bawk.

Nimin thutkhawmah hian faina endik tura ruatten District Level Cleanliness Committee-in endik dan tur tehfung hrang hrang a siam chungchang thlirho a nih bakah a endik tura ruat te hian an hmalakna leh endik dan tur lo sawiho leh se tih a ni a. Endiktute hian Faina  Hapta khar hunah an endik dan report tlangpui tarlang turin nimin thutkhawmah hian ruahmanna siam a ni a. Endikna chi hrang hrangah hian pakhatna atanga pathumna thleng lawmman siamsak tur a ni a.

Zirna in bikah hian Primary School Section, Middle School Section bakah High School /Higher Secondary School te hi a hran  theuhah lawmman siam ni ang.

Faina Hapta kharna hun hi October ni 9, 2019-ah neih ani ang a, hemi lawmman hrang hrang hi sem a ni ang a. District Level Cleanliness Committee chuan Faina Hapta neih chhung  chauhafaina kawngah hmalak chu an tum ber a nih loh thu sawiin, kumtluana faina kawnga mitin hmalak chhunzawm anih theihna tura inhrilhhriatna leh mipui rilru kaihharhna atan Faina Hapta neih chhunga fai inelna hi chu neih a ni tih an tarlang bawk.