FAINA TLUANTLING NEI TUR CHUAN NAUPANG ATANGA BUL TAN A PAWIMAWH

Get real time updates directly on you device, subscribe now.

Govt. G.M Higher Secondary School, Champhaiin kum 25 na a tlinna Silver Jubilee (1996-2021) lawmna kalzelah nimin khan Silver Jubilee Celebration Organizing Committee buatsaihin Zirtirtu leh Zirlaite chuan Champhai khawpui chhung hmun hrang hrangte insemdarha fangkualin faina beihpui an thlak.
Faina beihpui thlak hawnna hun Sikul tualzawla neih hmanpuitu Dr. Lallawmkima, DIPRO Champhai chuan Govt. G.M Higher Secondary School-in a din atanga kum 25 na, Silver Jubilee a thleng thei chu a lawmpui thu leh Jubilee lawmna puala hma an lak tawhna zawng zawng chu fakawm a tih thu sawiin, faina beihpui thlak an tan chu chhuanawm a tih thu a sawi a. Faina kawnga Champhai District-a hmalakna hrang hrangte tarlangin, faina tluantling nei tur chuan naupang atanga tanin inzirtirna kalpui angai a, faina nunpui tlat a tul a ni, a ti a. Fai duhna tak tak nunphunga kan lakluh loh chuan hnatlang bawk thin mah ila, a paihna tur ni lova bawlhhlawh kan paih zel si chuan kan fai kumtluan thei dawn lo a ni, a ti a. Zirlai kalkhawmte chu a tihbawlhhlawhtu ni lova, a thianfaia midangte zirtirtu nih tum fo turin a chah a ni.
DIPRO Champhai chuan zirna chu hmasawnna kawng sialtu pawimawh tak a nih angin thiamna hrang hrang bakah nunkawng dik zirna atana tangkai tak a nih thu pawh sawiin, Zirlaite chu an Sikul tihmingthaa chawisangtu nih tum theuh turin a fuih a. Faina beihpui thlak a tel tur zawng zawngte chu fai duhna tak tak neia theihtawp chhuah tur leh, khawpui fai leh mawi tak siam kawnga thahnemngai taka thawk theuh turin a sawm nghal bawk a ni.
Thusawitu dang Dr. Charles Romalsawma, Lecturer, Govt. GM HSS chuan kalkhawmte lawmna thu sawiin, Silver Jubilee lawmna puala hmalakna hrang hrangte hlawhtling taka neih a nih theihna kawnga thathawhtu zawng zawngte inpekna fakawm a ti a. Champhai khua mai nilo Mizoram pum ang pawha zirna in lian berte zing a mi Govt. G.M HSS Silver Jubilee puala faina beihpui thlak chu tun hun atan chauh nilo, nakin zel thlenga chhawmnun a tul thu sawiin, Silver Jubilee chuan faina tluantling a thlen ngei a beisei thu a sawi bawk.
Faina beihpui thlak hawnna hun hi Pu K.Hrangdawla, Lecturer, Govt. G.M HSS chuan a kaihruai a. Pi Lalthanpuii, Lecturer-in hunserh a hmang a. Pu Lalthantluanga Tochhawng, Lecturer leh Pu C.Zaihmingthanga, Lecturer ten faina beihpui thlak hnatlangte thawhchhuah dan tur an sawifiah hnuah Champhai khawpui chhung hmun hrang hrang chu thuang 10 a inthendarhin an fang kual a, khawlaia bawlhhlawh tlate thianfaiin faina beihpui an thlak a ni
Govt. G.M Higher Secondary School hi June, ni 25, 1996 khan din a ni a. Tun dinhmunah hian Zirlai 730 leh Zirtirtu 27 an awm mek a. Arts, Science leh Commerce zirna bakah Vocational Course pathum; Horticulture, Health Care leh Computer Technique-te a zir theih a ni.
Silver Jubilee lawmna pual hian tuilakna tha tak Jubilee Tuichhunchhuah Rs 1,20,000/- (cheng nuaikhat leh sing hnih) sengin Sikul tualah an siam a. November ni 9, 2021 khan NSS buatsaihin Blood Bank, District Hospital Champhaia hman turin thisen Unit 51 an pe bawk a. Heng bakah hian Souvenir leh Jubilee lungphun buatsaih mek niin, ruahman dan chuan December ni 14, 2021 hian Silver Jubilee lawmna pui ber neih tum a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More