FARKAWN BULAH INKAHNA THLENG

Get real time updates directly on you device, subscribe now.

Myanmar atanga Mizorama raltlana lut mi eng emaw zat chu an kir leh tawh a, hetih lai
hian Ningani-a Farkawn rala inkahna avangin mi 68 te Mizorama rawn luh belh beisei an awm thung.
Raltlan rawn lutte hi Sorkarin luh a remtih rih loh avangin Tiau kama an inkulhna tur Tuipuiral Group YMA chuan Silpauline an
ngaihtuahsak a. Inkahna hi nimin piah khan Chin State, Mizoram hnaih lam Tihbual leh Mualkai a chhuak niin thudawnna chuan a sawi a.
Chin National Front (CNF) leh Chinland Defence Force (CDF) te tangkawp chuan
sipai an kap a. Sipaite hian June ni 9 khan CNF te hmunpui hi an lo pan tawh niin thu dawn a ni.
YMA Sub Hqrs Champhai venhimna hnuaiah
mi 400 chuangte chuan ramri kanin Myanmar-ah an let leh tawh a. SYMA Champhai President F Lalrinmuana chuan, Myanmar atanga sahimna zawnga Mizorama
rawn tlanchhia, kir leh duhte hian him taka ramri an kan chu YMA in a duh avangin ramri
thlengin kan thlah thin, a ti.
SYMA Champhai hriatpui loh hian raltlan eng emaw zat an let leh tawh tih hriat a ni bawk a, mi 500 chuang chu an let leh tawh rin a ni.
Sorkar chhinchhiah danin Mizoram pumah
raltlan hi 16,000 vel an awm a, Champhai District bikah mi 3700 vel an awm bawk.
Raltlan lo dawngsawngtute zinga mi pakhat sawi dan chuan, Myanmar rama buaina in ziaawm lam a pan hret avang te; an sum leh pai neih ang ang nen an rawn chhuk an nih avangin, Mizorama hripui a hluar tak avang leh, Inkharkhip vanga engmah thawh theih a nih tak loh hnuah harsatna an tawk a. Sum leh paiah hian mi tlawmngai thenkhatte chuan
tanpuina pe bawk mah se, hri len hnuah tanpuina an dawn mumal theih tak loh avangin an let leh a ni, a ti.
Kir leh tura an ram ralmuang em tih zawhna
chhangin, Khaw thenkhatah chuan tharum thawhna a chhuak tawh lo va. Tuna kir lehte hi chung khuaa mite chu an ni tlangpui a. Chin State-a sipai leh Chinland Defence Force te inkahna khuaa mite chu an la kir leh ngam lo niin thudawnna chuan a sawi.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More