Nizan dar 7:00 atang khan Farkawn khuaah Covid 19 hrileng chu mipui zinga a darh nasat loh theih beiseiin inkharkhip pumhlum, Total Lockdown kalpui a ni ang.
Thu dawnna sawi dan chuan Farkawn khuaah hian nimin khan Raltlan rawn lut zinga mi 27 leh Khawtual mi 2 ten hri an kai tih hmuhchhuah a ni a. Hri leng mek a darh chak lutuk lohna tur leh, hnu chhui ngaite awlsam leh tha zawka chhui a nih theihna turin, nizan dar 7:00 atang khan Farkawn khuaah hian, Champhai District thuneitute remtihnain inkharkhip pumhlum kalpui a nih tur thu puan a ni.
Farkawn khuaah hian Myanmar atanga raltlan 785 an awm sa a, tun hnaiah 136 an rawn luh belh a. Raltlan te hi ni 7 chhung an chen lailawkna tur hmunah awmtir an ni a, Covid lakah an him leh him loh endik zui leh thin an ni a. Farkawn khaw chhunga mimal In a khung hran lai mek zingah damlo an awm avangin an dinhmun hi endik a ni a, mi 27 in Covid-19 hri an kai tih hmuhchhuah a ni a.
An awmna inchungte endik leh an ni a, In neitu Nu ber leh an fanu, sikul naupang ten hri an kai tih hmuhchhuah zui leh a ni tih thu dawn a ni.
Comments are closed.