Member 70 awmna God’s Gift Self Help Group-te’n an hminga loan latute mi 2-te chunga dan anga hma laksak turin Champhai Police Station-ah FIR an theh lut.
Kum 2020 September thla khan Tuangzapauva, Champhai Bethel Veng leh T Paulamthanga, Khuangphah khuate chuan kut hnathawktute hamthatna tura Sorkar laipuiin loan tha mi (KCC Loan) bank kaltlangin a pe chhuak dawn a, Self Help Group din a, loan Cheng 160000 chang tur leh an niin loan an buapui hah manah za zela 20, cheng 40,000 an hlawh ve ang tiin an thlem a, Champhai Bethel venga kut hnathawktute chuan Self Help Group 7, diin mi 70 an inziak lut a. Loan an puk hi a pawisa an hmuh hmain Mizoram Rural Bank, Champhai Branch atangin loan ba thinna an dawng ta a, God Gift Self Help Group-te chuan an loan puk an dawn hmaa pawisa thin an ni ta chu an hrethiam lo hle tih sawiin an hminga Loan latute chunga dan anga hma lak sak turin Champhai Police Station-ah FIR an thehlut a; Ngaizawl-ah pawh Self Help Group 5 hmingin Loan hi puk a ni bawk a, heng self help group-te hian Bank lamah complaint an theh lut tawh a ni.
Self Help Group member zinga thenkhat chuan an account-a pawisa awm ang angte chu Bank lam hian an cut zel tih an sawi a, SEDP sem turah pawh an account-a pawisa lutte cut sak an ni leh ang tih an hlauhthawn thu an sawi bawk.
He inbumna kaihhnawihah hian Hnahlan khuaa Self Help Group 5, member 50 awmna te chuan an hminga loan puktu mi pathum Lucas Thangmangliana, PS Zatuanga leh Tuangzapauva te lakah FIR an lo thehlut tawh bawk a ni.
He thila inhnamhnawiah puh zinga mi Lucas Thangmangliana tih lohte chu Champhai Police-te hian an man vek tawh a ni. Champhai Police-te sawi danin he inbumna thilah hian chhungkaw 1250 vel hmingin loan Cheng Nuai 2000 chuang an puk nia hriat a ni.
Comments are closed.