Nimin khan District Level Committee on Green Mizoram, Champhai District chu DFO Chamber, Bethel vengah Green Mizoram Day, 2021 hman dan tur relin an thukhawm.
He hun hi District Bawrhsap, Maria CT Zuali
chuan kaihhruaiin, kumina Green Mizoram Day thupui –‘ Tui hna leh boruak siam nan thing i phun ang u’ tih chu rorel tan hmain a sawi hawng hmasa a. Bawrhsap chuan thing a puitlin harzia ngaihtuahin, thing phun pawimawhna leh a hlutna chu kan hriat chian a tul hle a ni, a ti a. Thing phun pawimawhzia chu naupang atangin kan inzirtir a, kan inthan hnantir a pawimawh hle a ni, a ti. Bawrsapin thupui a sawi hawn hnu hian rorel tan nghal niin, karleh Zirtawpni, ni 11-a hman tur Green Mizoram Day, 2021-ah hian New Champhai leh Zotlang inkar, Ruantlang leh Melbuk inkar, Dist. Park Hringlang Tlang leh Mualbuhvum-te chu thing phunna tur hmun atan thlan a ni a. New Champhai leh Zotlang inkarah hian Nature Conservancy kaihhruaia thing phun tur niin, Ruantlang leh Melbuk inkarah hian DFO kaihhruaiin thing phun a ni ang a. District Park Hringlang Tlang-ah hian Lalnunmawia kaihhruaiin Mualkawi Branch YMA- te’n thing an phun ang a.
Mualbuhvumah hian YMA Sub Hqrs kaihhruaiin thing phun a ni ang. Thing phun tur hian New Champhai-ah innghah khawm tur niin, Green Mizoram Day, 2021 hawnna hun tawi buatsaih hmasak a ni ang a. He hunah hian ram kang ven dan tur kawnga thu ziak tha chanchinbute hnenah lawmman semna hun hman a ni bawk ang.
Nimin thutkhawmah hian Committee on Green Mizoram, Champhai District Committee ruangam leh member turte siam that nghal a ni bawk.
Comments are closed.