HALRAL THILHLAN A MIHRING HLAN TUM ANGA SAWI DELETE KOHHRAN

Get real time updates directly on you device, subscribe now.

Champhai Zotlanga awm Delete-ho tia hriat te chuan nizan hmasa khan an pa ber halral thil hlanah an hlan dawn nia thuthang finfiah turin Zotlang khawtlang hruaitute leh Champhai Police-te an kal a, thil duhawm lo a thleng zui lo.
Thu dawn danin Delete tia hriat lar ho hi Champhai Zotlanga-ah chhungkaw 7 vel an awm a, tun hnaiah Mizoram hmun dang atangin mikhual eng emaw zat rawn thlen belhin, Kar 3 chhung vel chu tuna halral thil hlana hlan an tum nia an sawi Pu Lalramnghaka inah hian an inkulhkhawm a. Tun hnai deuh lawk khan a mo chu a pum a na vak a, a kaw chhungah Pathian a lut, tiin Vantirhkoh-ah an puang niin an sawi a. A monu hian Halral thil hlan atan he inchhungkuaa pa ber, a upa ber hi Pathian hnenah hlan a ngai, tiin a puang niin an thenawma awmte chuan an sawi a. Niminpiah tlai khan heng inkulh khawm ho inbualna bik,
Tuikhur thianghlima-ah In neitu pa ber Pu Lalramnghaka hi an bualfai niin an sawi bawk.
Hetianga halral thil hlana pa ber hlan an tum tih thawm hi hriat a nih tak avangin Pu Lalramnghaka fapa upa ber, in hrang chang tawh, an pawla tel ve lo chuan chhungkhat laina hnaite a pun hnuah Zotlang khawtlang hruaitute leh Champhai Police hrilhin thil hrefiah turin inah hian an lut a. Heng inkulh hrang ho hian anmahni pawl lo chu Jentail-te tiin, Nunna bua hming chuang lote chu an tlawhpawh duh loh bakah biak pawh an be duh lo a. Zotlang khawtlang hruaitute chuan thil duhawm lo a thlen lohna turin Zotlang khua ni lo, Mikhual awmte chu chhuak turin a ngen a. Mikhualte chauh chhuak ta lo chuan, an za vaiin nizan hmasa khan an thawmhnaw te nen ‘Ramah hnim nem kan ei mai a ni ang chu’ tiin an chhuak ta vek a.
Nimin zing dar 2:00 vel khan an vai hian an awmna ngaiah hian an kir leh vek a, halral thil hlana hlan an tum nia sawi Pu Lalramnghaka pawh hi pindan hranah an la khung ni-a sawi a ni.
Zotlang VCP Biakchhunga chuan zawhna chhangin, heng mite hi an biak tawng theih loh avangin thuthang hi a dik ngei em tih finfiah a harsat thu a sawi a. An sawi duh chinah erawh chuan hethiang thil tih hi an tum lo niin an sawi thung tih a sawi.
Nimina he thil thleng finfiah tura kal kan palai-in thu zawhfiah a tum pawhin, “Pathian kan lo rawn zet ang e,” tiin an lo chhang a. Hun rei lo te an tawngtai hnuah, ‘Kan Pathianin a phal lo, min kalsan zawk mai rawh u’ tia chhangin, engmah chanchin zawh theih an ni lo.
Delete ti-a hriat lar ho hi sawrkar atanga hamthatna dawn theih chi zawng zawng te, Adhaar Card, Ration Card, Voters ID an neih duh loh bakah an Bank Account Passbook-te an lo halral tawh bawk a. Electric an pawh thin te pawh connection an ti tawp vek tawh bawk. YMA leh khawtlang thilah an inhnamhnawih ngai lova, an zinga tel ve lo chu Jentail-a ngaiin Nunna bua hming chuang lo turah an ngai a, an chhungkhat zawng zawng an tuithlar vek bakah biak pawh an be ngai lo hial.
An thenawm hnaia awmte sawi danin tun hnai chawlhkar 3 vel atang khan an neih thil tha tha te chu an hralh bakah halral thil hlanah an lo hlan tawh a. Tuna inkulh hrangte hi mikhual nen mi 70 vel an nih rin a ni a, tlawhpawh an duh loh avangin an zat chiah hi hriat theih an ni lo.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More