Champhai District High School Sports – 2022, a vawi 19-na chu nimin khan Chhangphut Field-ah hawna bultan a ni. Hawnna hun hi Pu T.T Laltanpuia, DEO & DPC Champhai District chuan khuallian niin a hmanpui a ni.
Khuallian Pu T.T Laltanpuia chuan thusawiin, hun engemawchen Covid-19 avanga District High School Sports neih theih a nih tawh loh hnua huaihawt a ni leh thei chu lawmawm a tih thu a sawi a. Zirlaite leh infiammite chu taksa leh rilru lama inbuatsaihna tha nei turte, District Level-a inelna chu tawp nana hmang lova, Champhai District chu Mizoram mai ni lo khawvel huap inelnaa pakhatna ni thei ngei tura hmalatu nih tum turin a chah a. Champhai chu Sports-ah a hniam thiang lo tih rilrua pu tlat turin a chah bawk.
DEO Champhai chuan Champhai District bikah infiamna lama tanlak nasat a ngaih thu sawiin, ruihhloin thalaite min tibuai nasa em em a, infiamna hrang hrangah ruihhlo min ti chhe theitu hi kan do a ngai a ni, a ti a. District High School Sports chu hmang tangkai a, intihsiakna chu zirna nena kalkawp tir theih a ni tih hriaa kal thiam turin a chah a. Zirlaite chu an hnapui ber zirna ngaihthah khawpa sports an ngaihtuah chuan thil pawi a thlen theih thu hrilhin, zirna thlahthlam lo tur leh rilru thianghlim tak nena infiamna bei turin a chah a, taksa hriselna vawng turin a chah bawk a. Champhai District tihmingthatu ni ngei tura chahin, Champhai District High School Sports-2022 chu tluang taka neih a nih theih nana duhsakna hlanin a hawng a ni.
Champhai District High School Sports-2022 hawnna hun hi Deputy DPC, Samagra Shiksha Pu H.Darhmingliana, Chairman, Organising Committee chuan a kaihruai a, Organising Secretary Pu JC Lalrammawia, Headmaster, Vengsang High School hnen atangin report ngaihthlak niin hruaitute leh infiamna hrang hrang endiktu turte inhmelhriattirna neih a ni a. Lalruatkimi, Class-X, Govt G.M. H/S chuan zirlaite leh infiammite intiamkamna a neih tir hnuah Champhai District High School Sports- 2022 chu intihsiakna chi hrang hrang – Football (boys), Volleyball (girls), Athletics (boys & girls) leh Badminton (boys & girls) hmangtein tan nghal a ni.
Champhai District High School Sports- 2022 ah hian Champhai District chhunga High School 28 te an tel thei a. October ni 7, 2022 (Zirtawpni) hian khar a ni ang.
Comments are closed.