Mipui hnena election kaihhnawih hrang hrangte zau zawka zirtirna, Systematic Voters’ Education and Electoral Participation (SVEEP) kaltlangin, nimin khan Govt. G.M High School, Champhaiah High School Zirlaite pualin lemziak hmanga inelna chu District Election Office chuan a huaihawt a, thupui atan ‘My vote My right’ tih hman a ni.
Zirlaite hnena election chungchang inhrilhhriatna tura duan, SVEEP Painting Competition tan hma hian Lalnunfela Chawngthu, Election Officer chuan thu a sawi a. Nakin lawka vote thlak rual ni tur leh vote nei mai turte chu kum 18 an tlin veleh
voter’s ID nei tura a tul angte buaipui turin a chah a. Inthlang ram leh mipui siam sawkar lalna rama awm kan ni a, vote nei tawh phawt chuan mahni chhia leh tha hriatna fim tak hmanga vote thlak hi kan dikna, chanvo leh
mawhphurhna a ni, a ti.
Electoral Roll-a inziahluh leh vote thlak chu khua leh tuite tih tur a nih thu sawiin, khua leh tui dik tak, kum 18 tlingte chu roll-a luh vek tum tur a ni a. Dik taka roll-a inziahluh a nih theih nan leh nakin zela a awlsam zawk nan certificate leh lehkha pawimawh hrang hrangahte hming, pian kum leh tul dangte inang thlapa ziah thin tur a ni, a ti a. Kan vote neih hi kan dikna leh chanvo a ni tih thupui hmanga lemziak inelnaa tel turte duhsakna a hlan nghal bawk.
Nimin lemziak inelnaah hian High School zirlai 16 an tel a. C.Lalrintluanga, Class IX, Pine Hill Adventist Academy chu pakhatna niin, Rs. 5,000 leh thuziak cheimawi a dawng a. Pahnihna Lalchhanchhuaha, Class X, BC Lalthlamuana English Academy chuan Rs. 3,000 leh thuziak cheimawi a dawng a. Pathumna Joseph Kamngaihliana, Class X, Holy Cross School chuan Rs. 1,000 leh thuziak cheimawi a dawng a. Heng bakah hian intihsiaknaa tel dangte pawh hi lawmman an pe vek a ni.
Comments are closed.