HLAWHTLINNA HMEL HMU MEKTE TLUKA HMUHNUAM AWMLO

Get real time updates directly on you device, subscribe now.

Lead Bank Champhai, Line Department pahnih A.H & Vety Department leh Fisheries Department-te tangkawpin an huaihawt, sangha leh ran vulhtuten Kisan Credit Card (KCC) Loan an hmelhriat theih nan leh hamthatna an dawn theihna kawnga inzirtirna, District Level KCC Camp chu Inrinni chawhma dar 11 khan Farkawn leh a chhehvel khuate tan Farkawn Community Hall-ah District Bawrhsap Pi Maria C.T Zuali hova neih a ni.
Bawrhsap Pi Maria C.T Zuali chuan India ram loneituten hma an sawn zawk nan leh tam zawk an thar chhuah theih nana KCC Loan siam chu mipuiten chiang zawka an hmelhriat a, a nihna ang tur taka an chhawr tangkai a duh thu a sawi a. Khaw taima tak Farkawn khuain nikum lamah loan lain hlawhtling taka Vawk an vulh thu leh hlawhtlinna an chang mek chu hmuh nuam a tiin, entawntlak a tih thu a sawi a. Loan diltute chu ngun taka inngaihtuah a, hna thawk tak takna tur leh hlawhtlinpui ngei thei tura rilru siam theuh turin a chah a ni.
He huna hian Dr. P.L Lalruatfela, Veterinary Officer leh Pu Lalmalsawma, Fisheries Demonstrator ten KCC Loan la tura inkaihhruaina leh kalphungte an sawifiah a. KCC Loan dil tumte chu loan rulh ngaipawimawh tur leh, a nihna ang ngeia hmanga hlawhtlinpui ngei tura chah an ni a, zawhna leh chhanna hun buatsaih a ni bawk.
KCC Loan hi Loneituten leirem an rah theih nana duan a ni a. Loan term hi kum 5 chhung a ni a, a pung a tlem a, za zela 7 in a pung a, loan rulh hun chhunga rul thate lawmpui nan interest subvention za zela 3 a awm a. KCC Loan a tam thei ang ber pek a nih theih nan Lead Bank, Line Department leh Bank-te tangkawpin hma an la mek zel a. Nodal department leh Bank-ah te dilna thlen theih a ni a. Cheng nuai thum (Rs. 3 lakh) thleng loan lak theih a ni a, KCC Loan cheng nuai khat leh singruk (Rs 1.6 lakh) chinah security leh guarantor a ngai lo a, hemi chunglam la tur tan erawh security leh guarantor a ngai thung a ni.
KCC Loan Camp-ah hian sangha leh ran vulh lama tui mite leh KCC Loan la duh turte an kalkhawm a. AH& Vety. Department kaltlangin KCC Loan dilna application form 73 pek chhuah a ni a, Fisheries Department kaltlangin KCC Loan dilna 26 pek chhuah a ni bawk.
KCC Loan Camp neih zawh hian Bawrhsap hian Vaphai, Sesih leh khaw dangte tlawhin ‘Piggery in Tiau WRC Area Project’ atana hmalak dan turte a enfiah nghal bawk a ni.
District Bawrhsap hi Pu Jyoti Munna Soren LDM, Dr. B.Zonghinga DVO, Pu B.Lalhmuchhuaka DAO, Dr.Lallawmkima DIPRO, Pu Lalhmunsanga DFDO leh Official dangten an tawiawm a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More