Cheng Nuai 1998 senna tur Champhai Keilungliah khuah kalpui mekah, Rawra tha lo supply ni-a thudawn bawhzuiin nimin khan Champhai NGOCC te chuan a hmunah kalin an enfiah.
Keilungliah khuah hna hi kum 2018 June thla atangin kalpui tan a ni a, kum 2018 October thla atangin a ruhrel din tan a ni.
Nimin-a NGOCC thawkchhuak te hian Keilungliah khuahna tura hmanraw pawimawh tak, Rawra chu a tha tawk lo hle tih an sawi a, rawra hi a intiat lo hle hlawm a, lei a tam hle bawk tih an sawi a.
A hmuna viltu Contractor leh JE te chu be nghal in, tuna an rawra kawl sa chu hmang tawh lo turin an hriattir a, an hmang zui a nih pawhin lei awm zawng zawng te chu tui hmanga tifai hmasa vek turin an ngen nghal bawk.
NGO CC chuan Keilungliah khuah tur chungchang hi hun rei tawh tak atanga an lo thlir tawh a nih thu leh, khuah a nih theihna tura hma an lo lak tawh dan te tarlangin, Champhai hmel timawitu tur leh khualzin hiptu tur a nih avangin, siam a nih laia uluk
a ngai hle a ni, an ti a. Rawra supply tu hian a hmaa rawra supply tu chu man tlawm zawkin a luahlan tih tarlan niin, a rawra erawh a chhe hle tih an tarlang bawk. He rawra supply tu hnen atang hian rawra la tawh lo turin an ngen nghal a. Heng rawra bal te hi an hmang lui a, hriatchhuah an nih chuan na taka hma an lak tur thu, hna viltu te an hriattir nghal a. Hna viltu JE leh Contractor te pawhin NGO te ngenna chu an ngaihpawimawh thu leh, an duh dan anga hma an lak nghal tur thu an lo hrilh niin thu dawn a ni.
Keilungliah hi metre 20 a sang khuah tur a ni a, metre 6 a sang in an siam tawh a, metre 14 an la hmabak a. Nimin thleng khan Keilungliah khuah hna kalpuina atan Cheng Nuai 900 chuang an seng tawh niin thu dawn a ni.
Comments are closed.