Agriculture Department Director, Saithantluanga chuan Inrinni khan Champhai Tlangsamah Champhai Organic Producer Company Integrated Pack House a hawng. Director chuan a tirah thil ropui takin a awm ngai lo tih sawiin, he Company hi ropui takin tan lo mah se thang zel tura nasa tak leh rim taka an thawh chuan sang tak an thleng thei tih a sawi a.
Hmarcha dip leh tlema hraw deuh siam chhuahna kawnga hma an sawn zel theihna tura an tih tur pawimawhte a tarlang a. Tumruhna leh tuarchhelna nei a, thawhhona tha tak nei tura chahin an duhsakna a hlan a ni.
Integrated Pack House hi MOVCD-NER Scheme hnuaia din niin, he Project hi kum 2019 atanga buaipui tan a ni a. Integrated Pack House ah hian hmarcha rawt dip-na khawl bun a ni a, hmarcha hi chi hnih-a siam niin a phut leh tlem a hraw deuh a siam a ni a. Kumin tantir atang khan khawl hi an hmang tan a, hmarcha phut hi Pack 1 gram 100 niin Rs 150 man a ni a, hmarcha tlem a hraw deuh zawka rawt dip erawh chu zawrh theih tura buatsaih fel a la ni lo thung.
Inrinni vek khan Director hian Ruantlanga Ginger Farmers Producers Organization te Collection Centre chu a hawng bawk.
Comments are closed.