National Commission for Women, National Legal Services Authority, Mizoram leh Champhai District Legal Services Authority chuan Champhai khawpuia MHIP Branch hrang hrangte tan “Hmeichhiate dikna leh chanvo” tih thupui zirhona hun an buatsaih.
Lalhlimthangi Khiangte, MHIP Sub-Hqrs Champhai President kaihhruaiah hian Vanlalena, Member Secretary, State Legal Services Authority, Mizoram chuan MHIP te chu service provider an nih angin dan chungchang an hriat chian an ngai tih a sawi a.
Hmeichhiate hian danin dikna chanvo a pekte an hriat chian ang bawkin an mawhphurhna leh an dinhmun pawh an hriat tel a tul a. Dan hi inlulinna tur ni lovin tawrhna laka min humtu zawk a ni, a ti.
F.Zomuansangi, Asst. Public Prosecutor (APP) Champhai leh Vinty Vanneihtluangi, Advocate te’n hmeichhe dikna leh an chanvo zirtirin Domestic Violence Act leh IPC hnuaia hmeichhiate Inchhung khura tharum thawhna lak ata venhim an nih dan te, taksa leh rilrua innghaisakna leh indiriamna, sum leh pai deh chhuah kawnga inhrekna lakah danin a humhalhna te, a tuartu te’n dan bawhchhiatna a thlen a, an zualko theih dan leh pawikhawihtu hrem theihna dan te zirtir an ni.
DLSA-in India in zalenna a hmuh kum 75-na lawmna puala Bharat Ka Amrit Mahotsav Programme hnuaia intihsiakna an siam lawmman sem a ni a, Zirlai naupang Pawl 5-8 inkarte tana ‘Protection of Women from Domestic Violence Act’ emaw ‘Wildlife Protection Act’ emaw hmanga lem inziahsiakah Vanlalrinawmi Pawl 6, Champhai Vengthlang chu pakhatna a ni a. Lalchhanchhuahi Pawl 8, Champhai Vengthlang chu 2-na niin Vanlalmalsawmzuali Pawl 5, Champhai Vengthlang chu pathumna a ni.
‘Legal Service Matter’ tih thupui hmanga Minute 10-15 a rei Video insiamsiak, pawl 9-12 inkar, kum 15-18 inkar emaw te tan intihsiakah Vanlalhmangaihawmi leh RC Lalchhandama, Pawl 12 chu pakhatna an ni a, Lalramluahsangi kum 18 mi chu 2-na niin, Vanlalthlana leh a thiante Pawl 12 zirlaite chu 3-na a ni.
Comments are closed.