HMUNPUI PAN NGAILO IN HNUKHNAI

Get real time updates directly on you device, subscribe now.

India ram zalenna kum 75 na tlin hriatrengna leh lawmna pual Azadi Ka Amrit Mahotsav (AKAM) lawmna denchhenin nimin ni 18.4.2022 (Thawhtanni) khan Champhai RD Block huamchhunga Hnahlan PHC ah National Health Mission (NHM) bultumin Block Level Health Mela buatsaih a ni. He hun hi Health & Family Welfare (H&FW) Board Vice Chairman Dr. ZR Thiamsanga, Champhai North bialtu MLA chuan khuallian ni a hmanpuiin a hawng a, Health Mela a sem chhuah tur damdawi thahnem tak a hlan bakah damlo a endik bawk a ni.
Khuallian Dr. ZR Thiamsanga chuan Block Level Health Mela Hnahlan khua leh a chhehvelte tana buatsaih a ni chu lawmawm a tih thu sawiin, a hlawhtlin nana tha thawhtu zawng zawngte, District Hospital Champhai atanga Doctor thiam tak tak leh thawktute chu chhuanawm a tih thu a sawi a. IMA in Hnahlanah Free Clinic neih an lo tum tawh thin thu leh hrileng vanga tum 2 ngawt thulh tawh a nih hnuah fur ruahtui tlak hma ngeiin health clinic lian tham tak neih hman ngei tuma ruahmanna siam a ni, a ti.
Health & Family Welfare Board Vice Chairman chuan sawrkar laipuiin mirethei leh hmun kilkhawr bera awmte thleng phak hriselna siam sak a dah pawimawh thu sawiin, Mizoram sawrkar pawhin thingtlang khaw tin Sub-Centre awm lohna khuaahte clinic hawn a tum a, khaw 200 chuangah hmalak tuma ruahmanna siam mek a ni, a ti a. Sub-Centre-te BSc Nursing thutchilh Health and Wellness Centre-ah hlankai chhoh mek zel a nih thu sawiin, a bial chhung bikah pawh khawpui chhung tih lohte hlankai kim vek tawh a nih thu a sawi a. Hnahlan PHC felfai taka enkawl a ni chu chhuanawm tiin, a enkawltu Doctor leh Staff-te a fak a. PHC mamawhte a tul anga buaipui zel tum a nih thu a sawi bawk.
Kalkhawmte chu hriselna bultanna kawnga pawimawh tak faina, ei leh in thianghlim leh nun hriselna kawng zawh ngaipawimawh hmasa fo turin a fuih a. Health Department kaltlanga hmasawnna siam hrang hrangte tarlangin, District Hospital Champhaiah ICU leh Dialysis tihna khawlte daha hman mek a nih thu te, ₹ vaibelchhe 21.38 senga sak tur khum 50 awm theihna Critical Care Centre sawrkarin a pawmpui tawh thu leh khum 50 awm theihna Ayush Hospital awm theihna tur sak tuma ruahmanna neih a nih thu a sawi bawk a. Inentir tura kalkhawmten damna tha tak an chan theuh theih nana duhsakna hlanin Block Level Health Mela chu a hawng a ni.
Thusawitu dang Dr.R.Lianmawia, CMO Champhai chuan Block Level Health Mela chu India ram zalenna kum 75 na lawmna puala neih a nih thu leh National Health Mission (NHM) kaltlangin District hrang hrangah hman a nih thu a sawi a. Mipuiten hriselna kawnga hma an sawn theihna leh hmunpui lam pan harsate tana inchhawp hnai a, District Hospital Champhaia inenkawlna neih that ber berte nena thawk chhuaka Hnahlan pan an nih thu a sawi a. Health Mela kaltlangin mipuite remchanna siam sak bakah, health service hrang hrangte chhawp hnaih sak an nih thu a sawi bawk.
He hun kaihruaitu Champhai District Bawrhsap Pu James Lalrinchhana chuan kalkhawmte lawmna thu sawiin inhmelhriattirna hun a hmang a. Dr. Lalrinhlui, Medical Officer, Hnahlan PHC chuan lawmthu sawiin hun a khar a ni.
Azadi Ka Amrit Mahotsav Block Level Health Mela-ah hian a thlawna inentir leh damdawi semchhuahna hun buatsaih a ni a. Clinic hrang hrang hawn niin, natna hrang hrang neite leh taksa hriselna inthlithlai duhte tan remchanna siam a ni a. Inkaichhawn theih loh natna lam te, zuk leh hmuam kaihhnawih lam te, rilru hriselna lam te, HIV/AIDS kaihhnawih lam te, ECG, Ultrasound, Family Planning & Councelling bakah Mobile Medical Unit thlenga buatsaih a ni a, khawl changkang zawk hmanga sample endik tulte pawh lak a ni a. Ayushman Bharat Digital Mission hnuaia India khua leh tui tinin hriselna kaihhnawih ID hran (Unique Health ID) an neih tur atana lo inziah lawk theihnate pawh kalpui niin, Specialist leh Doctor thiam tak takte chu mipui rawn theih turin clinic hawngin an thu a ni.
Hawnna hun tawi Hnahlan PHC tuala neih zawh a nih hnu hian nilengin Block Level Health Mela hi kalpui a ni a. Khuallian leh amah tawiawmtu District Bawrhsap-te tiamin mi thahnem tak an inentir a, chhinchhiah danin vawiina Block Level Health Mela buatsaihah hian damlo mai bakah mahni hriselna thlithlaia inentir mi 646 an awm tling a. He hunah hian District Hospital Champhai atangin Doctor 12 leh an thawhpuite, an vaiin mi 39 an tel thei a, Hnahlan MO leh Staff ten an tawiawm bawk a ni.
April ni 18-29, 2022 chhung hian India ram pumah Azadi Ka Amrit Mahotsav hnuaiah Block Level Health Mela buatsaih a ni dawn a. Ruahman dan chuan Undivided Champhai District chhungah Block Level Health Mela hi April ni 21 hian Khawbung RD Block tan Khawbungah, April ni 26 hian Khawzawl RD Block tan Kawlkulhah, April ni 29 hian Ngopa RD Block tan Ngopaah buatsaih tum a ni.
Vawiin vek khan Dr. ZR Thiamsanga hian Hnahlan PHC Solar Power Plant tekin a denchhiat siam that dan tur te, Govt. Hnahlan High School sak that dan tur leh Hnahlan Winery-te a tlawh bawk.
H&FW Board Vice Chairman hi District Bawrhsap Pu James Lalrinchhana, SP Pu Lalrinpuia Varte, CMO Dr. R.Lianmawia, DMS Dr. Zatluanga, Official dangte leh khawtlang hruaituten an tawiawm a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More