Hnahlan-ah chenna In kang

Get real time updates directly on you device, subscribe now.

Pu Dawngsiankhupa-te In, Hnahlan Vengthlang-a mi chu nimin zing dar 4 bawr vel khan bungraw chuh hman lohin a kang ral.
Thu dawn danin, In neitupa Pu Dawngsiankhupa hi Tuisa-ah hna thawka a riah lai niin, in a kan lai hian a nupui, Pi Lunsiansiangi leh a fapate pahnih – kum 4 mi leh thla 9 mite chu inah hian an awm a. An mu lai chu naute tapin nu ber chu ti harhin, a harh hian naute chu khum mawng lamah a lo awm a. Naute a pawh chhoh dawn chuan boruak lo sa lutuk chu hriain, chutah chuan in kang chu a hre ta chauh a ni.
An mutna pindan hi kawngkapui atanga luha thlang lam chiah niin, an tap mei hi an mut dawnah pawh a mit vek tawh a. Chhak lam atanga kangmei hi chhuak tan niin, Current kal sual ni-a ngaih a ni. In chhunga awmte’n in a kang tih an hriat hian an kawngkapui lam chu a lo sat tawh em avangin kawngkapui atanga chhuak ngam loin, kawngka thlang tukverh ft.7 vela sangah nu ber chuan a naupawm chu a zuan chhuahpui a, a hnuah a fapa upa zawk chu a hlang thla leh a; kangmei hi a nasat hman em avangin khawtlang pawhin an thelh mit thei ta lo a ni.
In leh bungrua kang chhia hlut zawng hi Cheng Nuai 5 vel ni a chhut a ni a, he in kang hian an thenawm Pu Huatzachina buhdengkhawl in chu kang kai in, khawl pawh hi a kang chhia niin thudawnna chuan
a sawi.
He chhiat tawh chungchangah hian Hnahlan VC leh NGO-te chuan nimin zing khan Joint Meeting an nei nghal a. Nimin vek khan Hnahlan khawtlang chuan In sakna tur – chak chi hrang hrang leh sum leh pai te
thawh khawmin, In hi sa thain an hnatlang nghal a. Dr ZR Thiamsanga, Champhai North Bialtu MLA chuan, hnatlanga thawk chhuakte thingpui inna tur atan Rs. 3000 a pek bakah, In chung tur rangva a pe dawn bawk a. Hnatlangah hian mi 200 chuang zet an thawk chhuak a, tunkar chhung hian luah theih a peihfel hman an tum a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More