Nimin khan Champhai-ah Focus Project hnuaia Vawk vulhtute tan Silage siam inzirtirna buatsaih a ni a, ran chaw chan sawmna khawl sem chhuah nghal a ni.
Project Management Unit FOCUS Project, Aizawl leh AH & Vety Department Champhai tangkawp buatsaihin nimin khan FOCUS Project hamthatna dawngtu, Undivided Champhai District-a Vawk vulhtute chu Silage siam zirtir an ni a, ran chaw chan sawmna khawl semchhuah a ni bawk. A hawnna hun DVO Pisa tuala neih hi District Bawrhsap Maria CT Zuali chuan khuallian niin a hmanpui a, FOCUS Project hamthatna dawngtu mi 18 te hnenah ran chaw channa khawl, Chaff Cutter a hlan a ni.
Khuallian Maria CT Zuali chuan, Vawk vulhtute tana ran chaw, Silage siam zirna buatsaih leh ran chaw chan sawmna sem chu lawmawm a tih thu a sawi a. Champhai District chu Vawk vulh tamna leh intodelh thei khawpa theihna nei a nih thu sawiin, Vawk hrileng, African Swine Fever laka him tlan nan theihtawp chhuah a nih thu a sawi a. Tanrualna avang chauha Champhai District a him rih thu leh Vawk hri lenna hmunte khuahkhirh a nih thu a sawi a. African Swine Fever bakah Food & Mouth Disease leng laka fihlim nan thupek chhuaha hman mek a nih thu a sawi bawk.
Sa hring bakah sawngbawl hnua ei tur dang siam leh zawrhsuma chang thei buatsaih kawngah tan laka hmasawn a ngai tih sawiin, Vawk vulhtute chu theihtawp chhuaha bei zel tur leh hlawkpui tham vawk vulh turin a chah a.
Thawhrimna chu Pathianin mal a sawm thin tih sawiin, sawrkarin hmanrua a pekte, neitu nihna thinlung pua enkawl thin turin a fuih a.
Cooperative Society dina hamthatna awm angte a theihna zawnah ngaihven zel tum a ni, a ti a. Ran vulha eizawngte chu Vawksa mai bakah sa dangahte pawh Mizoram chawmtu ni thei tura tanla turin a fuih a. Hnathawh zak lo va, hmasawnna tura taima taka bei thin turin a chah bawk.
Comments are closed.