HRI IN CHAMPHAI DISTRICT TUAM NASA

Nimin chawhnu khan Champhai Bawrhsap James Lalrinchhana hovin, Champhai District Level Committee on African Swine Fever & other Transboundary Animal Diseases chu DC Conference Hall-ah an thukhawm. He thutkhawmah hian African Swine Fever hrileng vanga harsatna awmte leh hmalak dante ennawn in, vawk thi phumna neilo te tana phumna tur chungchangte relin hmalak nghal a ni. Bawrhsap James Lalrinchhana chuan African Swine Fever hrilengin nunphung leh khawsak nasa taka a nghawng thu sawiin, hrileng vanga vawk chan leh harsatna tawkte a tawrhpui tak zet tih sawiin theihtawp chhuaha hmalak mek zel a nih thu a sawi a. District run mektu vawk hrileng African Swine Fever beihlet kawngah nasa lehzuala tanlak a, thahnemngai taka thawh ho a tul tih a sawi a.
Harsatna tawhte sawrkar hotute hnenah thlen a ni a, khaw tina mamawh angte zirchianga project siama hmalak mek zel a ni a, disinfectant leh mamawh dangte pawh tam zawk lo thleng leh thuai tura beisei a ni, a ti.
Dr. B.Lallawmsanga, DVO chuan ASF chungchanga District dinhmun tlangpui tarlangin April ni 27, 2022 a District Level Committee thurel bawhzui a nih dante a tarlang a. Disinfectant tam zawk nei tura hmalak dan leh mipui hnena fimkhur tura inzirtirna leh hriattur tul digital flyers kaltlanga thehdarh a nih dante a sawi bawk a. Rapid Antigen Test result behchhana hrileng dinhmun puan dan tura hmalak dante pawh a tarlang tel bawk.
Vawk thi phumna neilo tan YMA Sub-Hqrs Champhai ten khawtlang mamawhna hriaa phal taka Keifangtlang, Hmunhmeltha road kawng thlanga mi an ram hman hawh an phal chu, a hmunhma cheibawl dan turte a hmunah kalin enfiah nghal a ni a. Excavator hmanga vawk phumna tur laih nghal a ni.
Nimin khan khawtlang hruaitute District Bawrhsap hova thukhawm chuan, Vawk thi reng reng VC ah inhriattir hmasak hnuah Department lamah hriattir thin ni se, vawk phumna remchang neilo ten a phumna hmun tura ruat pan mai ni se, tiin an rel a. A hmunhma cheibawl, vawk thi buaipuitute leh lirthei tihthianghlim bakah inzirtirna tarlang thei siam turin Vety Department chu hma la tura ruat an ni.
AH & Vety Dept, Champhai tarlan dan chuan, ASF hrileng thawh khatna chu kum 2021 May ni 9 khan Champhai District-ah Zokhawthar khuaah hmuhchhuah a ni a. Vawk 548 in thihpuiin, October 2021 khan ASF vanga vawk thi hnuhnung ber report a ni. ASF thawhhnihna chu kumin February ni 4, 2022 khan Champhai Electric Veng atanga report a ni a. March ni 21, 2022 khan NDDRL Bhopal chuan a finfiah a ni. Tun thlengin khua leh veng 23 te nghawng mekin, khua/veng 12 te ASF hrilenna hmun ‘Infected Area’ ah puan a ni tawh a. Veng/khua 11 atanga sample lak result nghah mek niin, result azira hri lenna hmuna puan theih reng an ni.
Nimin khan vawk 83 thiin, 96 suat a ni a. February ni 4, 2022 atanga nimin thlenga ASF nia rin vanga vawk thi zat chu 1431 niin, vawk 1349 suat a ni a. A vaia vawk thi leh suat tawh zat chu 2780 a tling tawh a. Ram dang leh state dang atanga vawk, vawksa leh vawksa atanga siam Champhai District-a lakluh khap bakah, Champhai District chhung khuaa lakluh leh phurhchhuah khap zui zel a ni bawk.