Covid-19 hrileng laka mipui him nan ramri kaltlanga hri inkaidarh ven dan tur relin nimin khan Champhai District Bawrhsap Maria CT Zuali hovin DC Conference Hall-ah SP Lalrinpuia Varte, Official, YMA leh ramri dep VLTF hruaitute an thukhawm.
District Bawrhsap Maria CT Zuali chuan, Covid-19 hrileng laka himna tura State sawkar atanga ramri venghim tura lehkha hmuh bawhzuina kal zelah he thutkhawm hi koh a ni tih a sawi a. Myanmar nena ramri thui tak intawm, Champhai District-ah ramri ven uluk zual a ngai a. Hripui leng vangin ramri kaltlanga inkalpawhna, Free Movement Regime tihtawp lailawk a nih thu leh, kum hmasa lamah theihtawp chhuaha tanrualna
avangin hlawhtling taka ramri venhim a lo ni tawh thin tih a tarlang a. Khawtlang hruaitute
leh mipui te chu Covid-19 hrileng beihlet kawngah theihtawp chhuaha tanpui turin a sawm a ni.
He thutkhawmah hian doral thuhmun, Covid-19 do kawngah theihtawp chhuahtlan a ngai tih tarlan a ni a. Ramri kaltlanga hri kaidarh
thei veng turin ngawrh lehzuala ramri venghim tura hmalak tha an ti a. A theih chen
chenah Indo-Myanmar ramri dep khuaahte Covid-19 duty post siama ngawrh taka duty leh ni se tiin, Duty post turte thlan a ni a. Police ten tul leh mamawh dan ang zelin duty
post-te tlawhkualin vil thin se, an ti a. VLTF kaltlanga ramri veng tura inpete chu YMA
hruaitute leh VC ruahmannain mumal taka ziahfel hnuah BDO hnenah Volunteer list thehluh ni se. Thuthmun VLTF leh YMA Branch ten an huam chhungah rammut hna thawk se, an theih chin bak chu a tul ang zelin YMA Sub-Hqrs kuta thlena a tul anga bawhzui ni se, tiina n rel bawk.
Ramri ven leh senso tul angte pawh sawiho niin, Duty post thar siam kawnga mamawh angte chhut fela, District Disaster Management Authority hnena thehluh ni se, tiin an rel a. Hnahlan tlangdung leh Tuipuiral ramri dep khuaahte ramri kaltlang hri inkaidarh tur ven chhunzawm zel a ni tih tarlan a ni a. YMA hruaitute leh khawpui hnaivai, Tiau kai khua VLTF te hnen atangin ramri ven dan tura tulte ngaihthlak a ni bawk.
Comments are closed.