Champhai khawpui chhunga Covid-19 vei, natna langchhuak lo te khawtlang buaipuia sawrkar phalna kaltlanga enkawlna hmun, Community Covid Care Centre (4C) din a nih theih dan tur leh raltlan haw chungchang relin nimin chawhnu khan Bawrhsap Maria
CT Zuali hovin DC Conference Hall-ah thutkhawm a ni.
Bawrhsap Maria CT Zuali chuan, Covid-19 hrikai pung chho zelah 4C hman kher ngai lo
tura hri do kawngah tanlak zui zel a ngai tih sawiin, sawrkarin inenkawlna hmun a siamte indaih lo thei a nih avangin sawrkar pawmpui leh khawtlang enkawl ni bawk, Community Covid Care Centre/4C lo inruahman lawk a
tul thu a sawi a. Inkharkhip avanga chhuanchham mai thei dinhmuna dingte chhawmdawltu zawng zawngte chungah lawmthu sawiin, VLTF leh District mipui te chu theihtawp chhuaha thawhpui zui zel turin a sawm bawk.
Thutkhawmah hian VLTF hrang hrang atanga State pawn atanga lo haw khunghranna, Community Quarantine Centre tura hmunhma ruahman tawh a nih laiin, hri kai enkawlna tur 4C ruahman fel a la nih loh avangin hmunhma nei tha, Kohhran Pastor-te chu an hmun hmate 4-C atana hman dil ni se, an ti a.
Thutkhawma tel Champhai Town Area chhunga PCI Pastor-te chuan harsatna tawh mekah kohhranin puih theihna leh tangkaina a neihahte inthlahrunna tur a awm loh thu sawiin, 4C din chungchanga an hnena ngenna
thlente Kohhran Committee in a tul anga bawhzuia ngaihtuahho phawt ni se, an ti.
Thutkhawmah hian Champhai District paltlanga raltlan haw thin chungchang pawh ngaihtuah nawn leh a ni a, hri laka him tlan nan leh ramri kaltlanga dan lova thil tih awm palh thei ven nan ruahmanna felfai tak siam ni se tih a ni a.
He thutkhawmah hian Champhai SP Lalrinpuia Varte, Addl. DC Henry C.Lalrawnkima leh Official dang te, Champhai Town Area chhunga PCI Pastor te, VLTF Chairman theuh bakah YMA Sub-Hqrs. Champhai hruaitute an tel a ni.
Comments are closed.