Inrinni khan Champhai district chhungah hri kai mi 6 hmuhchhuah belh leh a ni a, hri lengin ziaawm lam a pan theih loh vangin Mizoram
sawrkar chuan June ni 14 thleng inkharkhip a pawh sei belh leh.
Hri kai hmuhchhuah mi 5-te hi tualchhunga
inkaichhawng Zokhawtharkhua vek niin, mi 2 te hi Rapid Antigen Test-a hmuhchhuah, hri kaina chin hriat loh an ni a. Mipa kum 15 mi ve ve, mahni inringhlela in test an ni a; Taksaa natna lang chhuak lo ve ve niin 4C Zokhawtharah dah luh nghal an ni.
TrueNat hmangin hri kai mi 4, mipa kum 47 leh kum 12 mi, hmeichhia kum 43 mite hmuhchhuah an ni bawk a. Positive Contact, taksaa natna lanchhuahna nei an ni a.
Pakhat hi Manipur atanga tun hnaia Zotlanga rawn haw, hmeichhia kum 52 mi, khung hran lai a ni.
Heti hian Champhai District chhunga Sample endik 14,349 atangin hri kai mi 219 hmuh chhuah tawh a ni a; sample endik atanga chhutin hri kai hmuhchhuah zat hi za zelah 1.52 a ni a. Hri kai enkawl dam mi 204 awm
tawhin enkawl dam zat hi za zela chhutin 93.15 a tling a, ni 3 chhunga enkawl dam zat
hian hniam lam a pan tawh a ni. Champhai District-a hri kai hmuhchhuah tawh 219
zinga 130 (Za zela 59.73) te chu tualchhunga hmuchhuah a ni a, a dang 89 te chu State pawn leh ram pawn atanga rawn haw te an ni.
Hripui thawh hnihna, May thla atangin hri kai mi 120 hmuhchhuah tawh niin, hri kai hmuh chhuah zinga za zela 69.74 (mi 83) te chu
tualchhunga inkaichhawng niin, midang 37 te chu State pawn leh ram pawn atanga rawn haw te an ni thung.
Champhai District chhungah Inrinni thleng khan hri danna mi 31,948 te hnenah pek
chhuah tawh niin, mi 27,495 ten Dose 1-na la tawhin, mi 4,453 ten Dose 2-na an la
tawh bawk.
Hetih lai hian Mizoram-ah hri lengin ziaawm lam a pan theih loh avangin inkharkhip kalpui mek chu pawhsei belh leh a ni a. Mizoram sawrkar chuan tun thla ni 14 zing dar 4 thleng khauh taka inkharkhipna kalpui mek chu pawhsei belh a nih thu Inrinni tlai khan a
puang a. Champhai District chhungah chuan inkaihhruaina dan hmanlai mek chu kalpui
chhunzawm a ni ang.
Comments are closed.