Champhai District chhungah hri kai mi 19 hmuhchhuah thar belh leh a ni.
Nimin khan Champhai District chhungah hri kai mi 19 hmuhchhuah belh leh a ni a, Rapid Antigen Test hmangin Zokhawrtharah hri kai mi 10 hmuhchhuah belh leh a ni a.
Zokhawthar hi tun dinhmuna Champhai District chhunga hri kai awm tamna ber khua niin hri kai hi 51 an awm mek.
Nimin khan Kanan vengah hri kai mi 5 hmuh chhuah niin, an zinga pakhat hi hri kaina chin hriat loh a ni a. Venglaiah hri kai mi 3 hmuhchhuah ni bawkin, an zinga hri kaina chin hriat loh pakhat a awm a. Venglai-ah hian hri vei enkawl lai 30 an awm mek a. Bethel Vengah hri kaina chin hriat loh pakhat hmuhchhuah a ni bawk.
Heti hian Champhai District chhungah hri kai hmuhchhuah zat chu 934 an tling tawh a, nimin khan enkawl dam mi 2-in enkawlna hmun an chhuahsan a, heti hian hri kai
enkawl dam 755 awm tawhin enkawl dam zat hi hri kai hmuhchhuah tawh atanga chhutin za zela 81.1 a ni a, hri kai enkawl lai mi 178 an la awm mek.
Vawiin atangin Champhaiah Covid 19 endik runpui kalpui chhunzawm leh a ni dawn.
Tun hnai hian Champhaiah hri kai an pun nasat avang leh hri kaina chin hriat loh hmuhchhuah an awm belh zel avangin Inrinni khan New Champhai leh Kahrawtah te Covid 19 endik hi kalpui tan a ni a. Vawiin hian Kanan Veng leh Dinthar vengah te endik a ni ang a, naktuk hian Electric vengah neih zui leh a ni ang a, Ningani-ah Venglai leh New Saron, Vengthlangah te endik zui leh a ni ang.
Covid 19 endik runpuiah hian endik tur bik bituk awm tawh lovin a nawlpuiin, a duh apiangte sample endik a ni tawh dawn a. Hetih lai hian Positive Primary Contact, TrueNat emaw RTPCR emawa test tura inkhung hrang te, Covid 19 hri kai enkawl dam tawh, an chhuah atanga thla thum la tling lo te leh TrueNat emaw RTPCR emaw test negative, ni 5 la tling lo te erawh chu an sample endik an ni dawn lo thung a ni.
Comments are closed.