Hripui leng thawh hnihna avanga tlawhpawh phal loh (Containment Zone-a) puan mek Zokhawtharah nimin khan hri kai mi 21 hmuhchhuah belh leh a ni.
Zokhawtharah hian Sample enfiah hmabak, in lama khung hran chhungkaw 86 awmin, nimin khan Sample lakhawmtute’n a hmunah kal chilhin sample endik a ni a. Sample 304 endik atangin hri kai mi 21 hmuhchhuah thar a ni a, nimina hri kai hmuhchhuahte hi kum 2 atanga kum 58 inkar, mipa 7 leh hmeichhia 14 an ni a; an vai hian Zokhawthar 4C ah dah luh nghal an ni.
Tarlan tawh angin Zokhawthar hi May ni 5 atangin tlawhpawh phal loh, Containment Zone-ah puan a ni a, Containment Zone-ah ni 15 chhung an awm hnuah hri kai thar hmuh chhuah an awm chhunzawm leh tak avangin
Zokhawthar hi Containment zone-ah puan chhunzawm zel a ni bawk. Zokhawtharah hian hri kai mi 75 hmuhchhuah tawh niin, mi 19 te enkawl dam an ni tawh a, hri kai 56 an la awm mek.
Nimin vek khan North Khawbung khua Mipa kum 26 mi, Delhi atanga lo haw, home quarantine lai mek, symptom nei lo leh Leithum khua Mipa kum 17 mi, Karnataka atanga lo haw, home quarantine lai mek, symptom nei lo te an Positive tih hmuhchhuah niin Positive hmuhchhuah hi mi 23 an ni.
Heti hian Champhai District chhunga hri kai hmuhchhuah zat hi 197 a tling tawh a, mi 127 te enkawl dam tawh niin, enkawl dam tawh zat hi za zela chhutin 65.12 a ni a, hri kai 70 an awm mek a ni.
Hetihlai hian, 3C Champhai-a hri kai enkawl mek, Zokhawthar khua hmeichhia kum 38 mi chu a thisena oxygen awm zat a tlakhniam deuh avangin enkawlna tha zawk beiseiin
Aizawl lamah nizan khan thawn thlak a ni a. A pasal, nimina hri a kai tih hmuh chhuah thar nen nizan khan Aizawl an pan tih thu kan dawng.
Comments are closed.