HRISEL TUR CHUAN KAN RILRU KAN THLAK DANGLAM HMASAK NGAI

Get real time updates directly on you device, subscribe now.

Nimin khan Directorate of School Education buatsaihin, Champhai SDEO hnuaia Primary leh Middle School zirtirtute tan Fit India leh Zonal Sports chungchang inhrilhfiah a ni a. Champhai Bawrhsap James Lalrinchhana, District Education Committee Chairman chuan khuallian niin a hmanpui.
Champhai Bawrhsap chuan zirtirtu hna chu, ram leh Pathian rawngbawlna a nih avangin Missionary rilru pu chunga thawh a ngai a; zirtirtu mawhphurhna chu a sang hle tih a sawi. Naupangte hnenah ngaihhlut tur an zirtir chu kum 15-20 hnuah a lan chhuah chauh thin avangin zirtirtu hna chu tih tak zeta thawh a ngai tih a sawi bawk.
Khuallian chuan Fit India Movement kalpui mekin a tum bulpui ber chu taksa, rilru leh thlarau hriselnate kalkawp vekin, kan nitin nuna behtir a ni, a ti a.
Mipui, chhungkua leh khawtlang hrisel nei tur chuan rilru sukthlek thlak danglam phawt a ngai a. Zirlaite zingah he movement hi kan tuh ngheh dawn chuan zirtirtu ten kan rilru kan thlak hmasak a ngai a. Fitness chuan mahni inrintawkna, chakna leh huaisenna a keng tel a. Chu chu taimakna, tumruhna leh chhelna hmanga hlawh chhuah thin a ni, a ti.
Champhai DEO TT Laltanpuia pawhin thu sawiin, Fit India Movement atan hian school tinah coordinator pakhat theuh dah in, ram hrisela Mizoram siam chu an kutah thui tak a innghat dawn tih a sawi a. Kalkhawmte chu Fit India thil tumte thehdarh a, naupangte-ah a rah chhuah an hmuh ngei theihna atana tan la turin a chah bawk.
Inzirtirna hi chawhma lamah Primary leh Middle School zirtirtute tan neih a ni a, chawhnu lamah High School Zirtirtute tan chhunzawm a ni a. Directorate atangin School Level-a Fit India kalpui dan turte leh Zonal Sports chungchang te inhrilhfiah a ni.
Nimina hun hman hma hian Farkawnah hetiang inhrilhfiahna hun hi hman a lo ni tawh bawk.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More